دانەگاز ئاستی بەرهەمهێنان بۆ 37 هەزار و 600 بەرمیل نەوت بەرزدەکاتەوە

ئاڤا نیوز

 

کۆمپانیای دانەگازی ئیماراتی کە لە کێڵگەی کۆرمۆر لە بواری بەرهەمهێنانی گازی سروشتی کار دەکات، ئاماری کار و چالاکییەکانی شەش مانگی یەکەمی ئەمساڵی بڵاوکردەوە. 

 

ڕاگەیێنراوی فەرمی: کۆمپانیای دانەگاز لە ڕاگەیەندراوێکدا بڵاوی کردووەتەوە، بەرهەمهێنانیان لە نیوەی یەکەمی ئەمساڵ بە ڕێژەی 3% بۆ 37 هەزار و 600 بەرمیل نەوتی هاوتای ڕۆژانە زیادی کردووە، بەهۆیەوە قازانج  و داهاتیان زیادی کردووە.

 

ژمارەکان وا دەڵێت: بەگوێرەی ڕاگەیێنراوی دانەگاز، لە چارەگی دووەمی ئەمساڵ قازانجیان بە ڕێژەی 3% بۆ 34 ملیۆن دۆلار بەراورد بە چارەگی یەکەمی پێش خۆی بەرزبووەتەوە. لە نیوەی یەکەمی ئەمساڵ داهاتی کۆمپانیاکە گەیشتووەتە 190 ملیۆن دۆلار لە بڕەشدا 72 ملیۆن دۆلار قازانجی بووە،  ئاستی بەرهەمهێنانیش بە ڕێژەی 3% بۆ 37 هەزار و 600 بەرمیل نەوتی هاوتا بەرزبووەتەوە، ئەو بەرهەمەشیان بۆ وێستگەکانی بەرهەمهێنانی کارەبا لە هەرێمی کوردستان دابین کردووە. 

 

گۆشەیەکی دیکەی دیمەنەکە: کۆمپانیای دانەگاز ئاماژەی بەوە داوە، سەرەڕای هێرشەکان لە ماوەی ڕابردوو بۆ سەر کێڵگەی کۆرمۆر، بەڵام بەردەوام دەبن لە فراوانکردنی پڕۆژەی کۆرمۆر 250.

 

ئەوەی پێویستە بیزانیت: لە 26ـی مانگی نیسانی ڕابردوو، یەکێک لە عەمبارەکانی کۆمپانیاکە بەهۆی هێرشی درۆنەوە زیانی بەرکەوت، بەڵام هەرزوو چاککرایەوە، لە ماوەی چەند ڕۆژێکدا، دوای گرتنەبەری ڕێوشوێنی پێویستی لەلایەن حکومەتی هەرێمی کوردستان و حکومەتی عێراق بۆ پاراستنی کێڵگەکە، ئاستی بەرهەمهێنان گەیشتەوە ئاستی ئاسایی خۆی.