لەبارەی پارەی گەنمی جووتیاران نووسراوێک بۆ سوودانی دەکرێت

ئاڤا نیوز

 

ئەندامێکی لیژنەی کشتوکاڵی لە پەرلەمانی عێراق بە نووسراوێکی فەرمی داوا لە حکومەتی عێراق دەکات ئەو بەشە پارەیەی گەنمی جووتیاران کە لەلای عێراق ماوە خەرج بکرێت.

 

وێنە گەورەکە: لەدوای شەش مانگ لە پڕۆسەی ڕادەستکردنی گەنم، لەکۆی 598 ملیار دینار کە بۆ گەنمی جووتیارانی هەرێمی کوردستان تەرخانکراوە، کەمتر لە نیوەی ماوە لەلایەن حکومەتی فیدڕاڵییەوە بنێردرێت، لەکاتێکدا دەبوو ئەمساڵ لەگەڵ ڕادەستکردنی گەنم جووتیاران پارەکەیان وەرگرن.

 

لێدوانی فەرمی: زۆزان کۆچەر، ئەندامی لیژنەی کشتوکاڵ لە پەرلەمانی عێراق بە ئاڤا نیوزی گوت، "نووسراوێکمان ئاراستەی محەممەد شیاع سوودانی، سەرۆکوەزیرانی عێراق و  وەزارەتی بازرگانی کردووە، بۆ ئەوەی 46.66%ی پارەی گەنمی جووتیاران کە لای عێراق ماوە خەرج بکرێت، بڕیارە لە ئایندەیەکی نزیک 150 ملیار دیناری دیکە بخرێتە سەر هەژماری بانکی هەرێمی کوردستان."

 

ئەوەی پێویستە بیزانیت: تاوەکو ئێستا 319 ملیار دینار پارەی ڕادەستکردنی گەنمی جووتیارانی هەرێمی کوردستان نێردراوە و 279 ملیار دینار ماوە کە لەلایەن وەزارەتی بازرگانی عێراقەوە خەرج بکرێت.

 

 ئەمەش بزانە: جووتیارانی هەرێمی کوردستان، کەرکووک، نەینەوا و ژمارەیەک پارێزگای دیکەی عێراق هێشتا بەشێکی پارەیان وەرنەگرتووە و حکومەتی عێراق بیانووی نەبوونی پارەی نەختینە دەهێنێتەوە.