عەلی لاریجانی: ئامادەین ڕێککەوتنێکی ئەتۆمی نوێ لەگەڵ ترەمپ بکەین

ئاڤا نیوز

 

لە دوای گرژییەکانی ئەم دواییەی تاران لەگەڵ ئاژانسی نێودەوڵەتی بۆ وزەی ئەتۆمی و گەڕانەوەی ترەمپ بۆ کۆشکی سپی، لە ناوخۆی ئێران داوا دەکرێت بە ووریایی و ئارامییەوە مامەڵە لەگەڵ دۆخەکە بکرێت. تەنانەت داواش دەکرێت لەگەڵ ترەمپ ڕێککەوتن بکرێت.

 

لێدوانی فەرمی: عەلی لاریجانی، ڕاوێژکاری خامنەیی و سەرۆکی پێشووی پەرلەمانی ئێران ڕایگەیاند، گەیشتن بە ڕێککەوتنێکی نوێ لەگەڵ ئەمریکا و خۆرئاوا تاوەکو جێگای ڕێککەوتنە کۆنەکەی ئەتۆم بگرێتەوە، کارێکی قبوڵ کراوە و ئامادەین لەگەڵ ئیدارە نوێیەکەی ترەمپ گفتووگۆ بکەین و بگەینە ڕێککەوتن.

 

لەلایەکی دیکەوە: عەلی لاریجانی، لەمداوایانە کە سەردانی سووریا و لوبنانی کردبوو بۆ گەیاندنی پەیامی خامنەیی بە سەرکردەکانی ئەو دوو وڵاتە، ئەوەشی خستووەتە ڕوو کە ئێران توانای پیتاندنی یۆرانیۆمی هەیە تاوەکو 60٪.

 

ئەوەی پێویستە بزانیت: لاریجانی لەبارەی ئەگەری بەردەوامی بۆ بەرهەمهێنانی یۆرانیۆم، ئەوەشی ووتوە، کە ئێران چیتر یۆرانیۆم بەرهەم ناهێنێت، ئەگەر بگاتە ڕێککەوتنێکی گونجاو لەگەڵ ترەمپ.

 

ئەوەش بزانە: سەرکردەکانی ئێران سەردانی ئەم دواییەی ڕافائێل گرۆسی، بەڕیەوەبەری گشتی ئاژانسی ئەتۆمییان بۆ ئێران پێناخۆش بوو بە تایبەت دوای ئەوەی سەردانی دوو دامەزراوەی ئەتۆمی ئێرانی کرد.