حیزبوڵڵا 40 مووشەک ئاراستەی ئیسرائیل دەکات

ئاڤا نیوز

حیزبوڵڵای لوبنان  بنکەیەکی چاودێری ئاسمانیی سوپای ئیسرائیل بە چەند مووشەکێک بە ئامانج دەگرێت، ئەمەش وەک وەڵامێک بۆ هێرشێکی ئیسرائیل لە ناوچەی بەعلەبەگ کە دوێنێ دووشەممە کردوویەتی.

بۆچی گرنگە: بەهۆی فراوانبوونی شەڕی نێوان حەماس و ئیسرائیل، سنوورەکانی لوبنان نائارامن و خەریکە شەڕەکە بۆ نێوان ئیسرائیل و حیزبوڵڵا دەگوازرێتەوە و ژمارەیەکی زۆر لە دانیشتووانی سنوورەکە ئاوارەبوون.

ڕاگەیێنراوی فەرمیی: حیزبوڵڵا ڕایگەیاند: بنکەی میرۆنی ئاسمانیی ئیسرائیلی بە چەند مووشەکێک کردووەتە ئامانج. میدیا عەرەبیەکانیش دەڵێن هێرشەکە لە باکووری ئیسرائیل نائارامیی دروستکردووە.

بۆچوونی لایەنی بەرامبەر: سوپای ئیسرائیل پشتڕاستی کردەوە لە لوبنانەوە چەند مووشەکێک ئاراستەی باکووری وڵاتەکە کراون و بەم هۆیەوە زەنگی ئاگادارکردنەوە لێدراوە. میدیاکانی ئەو وڵاتەش دەڵێن 40 مووشەک ئاراستەی بنکەی میرۆنی ئاسمانی کراون.

باکگراوند: لە حەوتی ئۆکتۆبەری ساڵی ڕابردووەوە کە شەڕی نێوان حەماس و ئیسرائیل سەریهەڵداوە، لەسەر سنووری لوبنان و ئیسرائیل 276 کەس کوژراون، 191 یان ئەندامی حیزبوڵڵا و 44 یان سڤیل و سێ کەسیان ڕۆژنامەنووسن، ئیسرائیلیش کوژرانی 10 سەرباز و شەش سڤیلی ڕاگەیاندووە.