شاندی تەکنیکی هەرێمی کوردستان لەگەڵ وەزیری دارایی عێراق کۆدەبنەوە

ئاڤا نیوز

 

شاندێکی تەکنیکی وەزارەتی دارایی و ئابووری هەرێمی کوردستان ماوەی دوو ڕۆژە لە بەغدایە بە ئامانجی کۆتاییهێنانە بە تێبینییەکانی وەزارەتی دارایی فیدراڵ لەسەر لیستی مووچە، ڕێکخستنەوەی داهات و شێوازی خەرجی تەرازووی پێداچوونەوەیە.

 

وێنە گەورەکە: ماوەی شەش ڕۆژ تیمی تەکنیکی وەزارەتی دارایی فیدراڵ لە هەولێر بوو بە مەبەستی ئامادەکردنی ڕاپۆرتێک لەگەڵ تیمی تەکنیکی وەزارەتی دارایی و ئابووری هەرێمی کوردستان سەبارەت بە وردبینی دارایی لە 11 مانگی ساڵی 2024 و پێداچوونەوە بە سەرجەم تێبینییەکانی دارایی عێراق. هاوکات لیستی مووچەی مانگی 12 لەگەڵ خۆیان دەبەن.

 

زانیاریی بەدەستهاتوو: بە گوێرەی بەدواداچوونی ئاڤا میدیا، بڕیارە ئەمڕۆ ڕاپۆرتەکە ببرێتە بەردەم تەیف سامی بۆ ئەوەی بڕیار لە خەرجکردنی 430 ملیارەکە بدات، هاوکات باس لە ناردنی مووچەی مانگی 12 دەکرێت کە شایستەی دارایی مانگی 11یە بەڵام بەغدا پێداگری دەکات کە ناردنی ئەم مووچەیە بۆ مانگی 12 یە. 

 

زانیاریی زیاتر: وەزارەتی دارایی عێراق پارەی مووچەی مانگەکانی 10 و 11 بە کەموکوڕی ناردووە و نزیکەی 600 ملیار دینار کورتهێنانی هەیە، بۆیە دەست بە دابەشکردنی مووچەی مانگی 11 نەکراوە، ئەگەر ئەم هەفتەیە پارە بنێردرێت، هەوڵەکان بۆ ئەوەن پێش سەری ساڵ دەست بە دابەشکردنی مووچەی مانگی11 بکرێت.