ئەمساڵ سێ هەزار و 705 مۆڵەت بە بازرگانان دراوە

ئاڤا نیوز

 

قەبارەی هاوردەکردنی کاڵا و شتومەک بۆ هەرێمی کوردستان لە زیادبووندایە و حکومەت لە ساڵی داهاتوودا پلانێکی نوێ جێ بەجێ دەکات. بەجۆرێک ئەمساڵ سێ هەزار و 705 مۆڵەت بە بازرگانان دراوە.

 

وێنە گەورەکە: ئەمساڵ بە گوژمەی شەش ملیار دۆلار (چەکی بانکی) بە بازرگانان دراوە تاوەکو کاڵا و شتومەک بهێننە هەرێمی کوردستان، هاوکات 41 پرۆژەی بازرگانیی لە دەستەی وەبەرهێنان مۆڵەتیان وەرگرتووە.

 

لێدوانی فەرمی: نەوزاد شێخ کامیل، بەڕێوەبەری گشتیی بازرگانیی هەرێمی کوردستان بە ئاڤا میدیای ڕاگەیاند: ئەمساڵ سێ هەزار و 705 مۆڵەت بۆ بازرگانان دراوە تاوەکو کاڵا و شتومەک بهێنن، لە ساڵی داهاتووشدا نووسینگەی بازرگانیی لە دەروازە سنوورییە نێودەڵەوتییەکان دەکرێتەوە، تاوەکو بازرگانان بتوانن لەوێوە مۆڵەت لە بەرێوەبەرایەتییەکە وەربگرن و کاڵا و شتومەک بهێنن.

 

زانیاریی زیاتر: ئەمساڵ 41 پرۆژەی بازرگانی بە سەرمایەی 387 ملیۆن و 520 هەزار و 148 دۆلار مۆڵەتیان لە دەستەی وەبەرهێنان وەرگرتووە کە ڕێژەی 11.07% لە سەرمایەی سێکتەرەکان بۆ ئەمساڵ پێکدەهێنێت.