لەندەن خۆی بۆ سەری ساڵ ئامادە دەکات

ئاڤا نیوز

 

لەندەن خۆی بۆ شەوێکی سەرنج راکێش و نایاب ئامادەکردووە؛ شەوێک کە یارییە ئاگرینەکان شارەکە ڕووناک دەکەنەوە و دەرگای 2025 لەسەر ئەم پایتەختە دەکەنەوە. تاوەکو ئێستاش زیاتر لە یەک ملیۆن بلیتی ئاهەنگی پێشوازیکردن لە ساڵی نوێ فرۆشراون و نزیکەی 40 ملیۆن گەشتیاریش پشووی ساڵەکەیان لێرە بەسەر دەبەن. 

 

وێنە گەورەکە: ئاهەنگەکە بەسەر ناوچە گەشتیاریی و سەرنجڕاکێشەکاندا دابەشبووە. کەناری ڕووباری تایمز و چاوی لەندەن و نزیک تەلاری پەرلەمانی وڵاتەکە لە دیارترین شوێنە گەشتیارییەکانن، بەڵام یارییە ئاگرینەکان لە نێو کەشتی ڕووباری تایمز و چاوی لەندەن هەڵدەدرێن کە بە دڵخوازترین شوێنی گەشتریاران دادەنرێن. لەو شەوەدا چاوەڕاندەکرێت بایی چوارملیۆن پاوەند یاریی ئاگرین لە ئاسمانی لەندەن بتەقێنرێن.

 

لێدوانی فەرمی: گەشتیارێک لەبارەی ئاهەنگەکانی لەندەنەوە بە ئاڤای ڕایگەیاند، "من لێرەم بۆساڵی نوێ، لەسەری ساڵ لەندەن کەشێکی تایبەت و خۆش هەیە سەرنجراکێشترین یاری ئاگرینی هەیە."

 

زانیاریی زیاتر: نرخی بلیت لە نێوان 20 بۆ 50 پاوەندە، بەڵام بە 15 پاوەند کەمتر بۆ دانیشتوانی شارەکە دابینکراوە. هەروەها بەشێک لە داهاتی ئاهەنگەکە دەدرێتە رێکخراوی خێرخوازی TAP LONDON کە بایەخ بە کەسانی بێ ماڵ و لانە دەدات. 

ئەمەش بزانە: ئەگەرچی ساڵانێکە ماڵئاوایی لە یەکێتی ئەوروپا کردووە، بەڵام هێشتا وەک پایتەختی گەشتیاریی ئەوروپییەکان ماوەتەوە. میوانخانەکانی ئەم شارە پڕن لە گەشتیار و هەر ئەمەش وایکردووە چاوەکان لەسەر ئەم شارە بن هەرچەندە زۆربەی پایتەختەکانی دنیا بە ئاهەنگەوە دەچنە نێو ساڵی نوێ.