عێراق لە هەناردەكردنی نەوت بۆ ئەمریكا پێش سعودیە دەكەوێت

ئاڤا نیوز

 

دەزگای وزەی ئەمریكا ڕایدەگەیێنێ، عێراق لە هەناردەكردنی نەوت بۆ ئەمریكا پێش سعودیە كەوتۆتەوە.

 

وێنە گەورەكە: ئەمریكا بۆ دابینكردنی بڕی پێویستی بەكارهێنانی نەوت و عەمباركردنی یەدەگی نەوت ڕۆژانە سەرووی پێنج ملیۆن بەرمیل نەوت لە هەریەك لە وڵاتانی كەنەدا، مەكسیك، فەنزوێلا، كۆلۆمبیا، بەڕازیل، عێراق، سعودیە، لیبیا هاوردە دەكات.

 

ڕاگەیێنراوی فەرمی: دەزگای زانیارییەكانی وزەی ئەمریکا، ئەمڕۆ شەممە 04-01-2025 ڕایگەیاند، عێراق لە ماوەی هەفتەی ڕابردوودا لە هەناردەکردنی نەوت بۆ ئەمریکا پێش سعودیە کەوتووە.

 

زانیاریی زیاتر: تێکڕای هاوردەکردنی نەوتی خاو بۆ ئەمریکا لە ماوەی هەفتەی ڕابردوودا لە نۆ وڵاتی هەناردەكاری نەوتەوە، گەیشتووەتە 5 ملیۆن و 765 هەزار بەرمیل لە ڕۆژێکدا، کە بە بەراورد بە ڕابردوو 79 هەزار بەرمیل لە ڕۆژێکدا کەمبووەتەوە.

 

لەلایەکی دیکە: هەفتەی ڕابردوو هەناردەی نەوتی عێراق بۆ ئەمریکا 212 هەزار بەرمیل بووە لە ڕۆژێکدا، کە بەراورد بە هەفتەی پێشوو 17 هەزار بەرمیل لە ڕۆژێکدا کەمیکردووە، کە 229 هەزار بەرمیل بووە لە ڕۆژێکدا. بەم شێوەیەش سعودیەی تێپەڕاندووە، کە هەناردەکردنی بۆ ئەمریکا گەیشتووەتە 87 هەزار بەرمیل لە ڕۆژێكدا.