حکومەتی ئۆزباکستان: ئەو کەسانەی بە پێ دەڕۆن ئۆتۆمبێلیان پێدەدرێت

ئاڤا نیوز

 

ئۆزباکستان گفتوگۆ لەسەر ڕەشنووسی فەرمانێکی سەرۆکایەتیی دەکات کە ئامانج لێی باشترکردنی کەشوهەوای وڵاتەکەیە و لە بەرامبەردا ئۆتۆمبێل دەداتە هاوڵاتیانی.

 

وێنە گەورەکە: فەرمانەکە، لە 1ی حوزەیرانی 2025ەوە دەکەوێتە بواری جێبەجێکردنەوە و لە چوارچێوەی هەڵمەتێکی سەرتاسەری لە ژێر ناونیشانی "یەک ملیۆن خێزانی سەوز"، پلاتفۆرمێکی تایبەت دەخرێتە کار کە لە ڕێگەی ئەم پلاتفۆرمەوە ئەو هاووڵاتییانەی لە ڕۆژێکدا لانیکەم 10 هەزار هەنگاو بە پێ دەڕۆن، پلەی هاوڵاتی چالاکی ژینگەییان پێدەبەخشرێتەوە و چەند خزمەتگوزارییەک دەیانگرێتەوە.

 

زانیاری زیاتر: ئەو کەسانەی پلەی هاوڵاتی چالاکی ژینگەییان پێدەدرێت ئەم خزمەتگوزارییان دەیانگرێتەوە:

- %10ی داشکاندنیان لە خزمەتگوزارییە گشتیەکان بۆ دەکرێت.

- لەو بانکانەی کە حکومەتی ئۆزباکستان زیاتر لە 50% پشکی هەیە، داشکاندنیان لە قەرزەکاندا بۆ دەکرێت.

- ئەگەر هەموو ئەندامانی خێزانێک پلەی هاوڵاتی چالاکی ژینگەیی بەدەستبهێنن، ئەوا خێزانەکە وەک خێزانێکی سەوز دەستنیشان دەکرێت و چانسی بردنەوەی ئۆتۆمبێلێکی کارەباییان دەبێت کە ساڵانە لە ڕێگەی تیروپشکەوە دەدرێتە ئەو خێزانانە.

 

باکگراوەند: لە ساڵی 2021ەوە ئەو هاووڵاتییانەی ڕۆژانە 10 هەزار هەنگاو بە پێ دەڕۆیشتن، 3 هەزار دراوی ئۆزباکستانییان پێدەبەخشرا، لە مانگی یەکی ساڵی 2022 ئەم پڕۆژەیە ڕاگیرا و لە شوێنیدا سیستەمێکی نوێی هاندان خرایە کار کە بریتی بوو لە پاداشتی هەفتانەی 100 ملیۆن دراوی ئۆزباکستان و هەزار پاسکیل، بەڵام دوای سێ مانگ بە تەواوی ئەم سیستەمی هاندانە بۆ پیادە ڕۆیشتن هەڵوەشایەوە و حکومەتی ئەو وڵاتە دەیەوێت پڕۆژەیەکی دیکە جێبەجێ بکات.