تاوەرەكانی ئینتەرنێت لە هەرێمی كوردستان زیانی تەندروستییان هەیە؟

ئاڤا نیوز

بەپێی بەدواداچوونی ئاڤا، تاوەرەكانی پەیوەندی و ئینتەرنێت لە هەرێمی كوردستان بەگوێرەی ڕێنماییەكانی تەندروستی جیهانی و فیدراسیۆنی جیهانی بۆ پەیوەندیكردن دانراون و هیچ زیانێكی بۆ تەندروستییان بۆ هاووڵاتیان نییە.

وێنە گەورەكە: لەسەر بنەمای ئەو ترس و دڵەڕاوكێیەی لەلای هاووڵاتیان دروست ببوو گوایە تاوەرەكانی پەیوەندی و ئینتەرنێت كاریگەری نەرێنی لەسەر سەلامەتی مرۆڤ دەبێت، لە ماوەی ڕابردوودا داواكاری گشتی بەهەماهەنگی لەگەڵ دەستەی پاراستن و چاككردنەوەی ژینگەی هەرێمی كوردستان و هەردوو وەزارەتی تەندروستی و گواستنەوە و گەیاندنی حكومەتی هەرێمی كوردستان، بەدواداچوونێكی وردی بۆ ئەو بابەتە كرد و دەركەوت لە كاتی دانانی تاوەرەكان مەرج و ڕێنماییەكانی هەردوو ڕێكخراوی تەندروستی جیهانی و ڕەچاوكراون و هیچ زیانێك و كاریگەرییەكی بۆ سەر تەندروستیی هاووڵاتیان نییە.

گرفتەكە چییە: بوونی تاوەرەكانی پەیوەندی و ئینتەرنێت لەنێو ئەو گەڕەك و كۆڵانانەی كە ڕێژەی دانیشتووانی چڕە، نیگەرانی لای بەشێك لە هاووڵاتیان دروستكردووە، بەو پێیەی وا لێكدەدرایەوە کە زیانی بۆ سەر سەلامەتی جەستەوە هەیە، بۆ ڕەواندنەوەی ئەو ترسەش لەماوەی ڕابردوودا سەرۆكایەتیی ئەنجوومەنی وەزیرانی هەرێمی كوردستان دەزگا پەیوەندیدارەكانی ڕاسپارد بەدواداچوون بۆ ئەو بابەتە بكەن.

زانیاریی بەدەستهاتوو: بەپێی ئەو زانیارییانەی لە سەرچاوەی فەرمییەوە دەست ئاڤا میدیا كەوتووە، لە كاتی دانانی بورجەكانی شەپۆڵی ڕادیۆیی و تەلەفزیۆنی و كۆمپانیاكانی پەیوەندی و ئینتەرنێت، مەرج و ڕێنماییەكانی هەردوو ڕێكخراوی ‘ WHO ' و ' ITU' ڕەچاوكراون و شەپۆڵی تیشكی لەرە لەری دەرچوو لەو بورجانە كەمترە لە 0.4 میلی وات لە سانتیمەترێك دووجا.

- هاوكات ئەوەش لەبەرچاو گیراوە كە بەرزی هەر تاوەرێك لە 15 مەتر كەمتر نییە.
- هیچ تاوەرێك بۆ ئینتەرنێتی شەپۆڵ بەرزی "فایف جی" لە هەرێمی كوردستان لە نزیك شوێنەكانی نیشتەجێبوون دانەنراون.

خاڵە نەرێنییەكان: هەر تاوەرێكی پەیوەندی و ئینتەرنێت ئەگەر ڕێژەی دەرچوونی تیشكی لە سەرووی 0.4 میلی وات لە سانتیمەترێك دووجا بێت، ئەوا كاریگەری لەسەر پێستی مرۆڤ و دروستكردنی خانەی شێرپەنجەیی لە جەستەی مرۆڤدا دروست دەكات.