نەتەوە یەكگرتووەكان: زیاتر لە دوو هەزار منداڵی غەززە پێویستیان بە چارەسەری خێرا هەیە

 

ئاڤانیوز

ئەمینداری گشتیی نەتەوە یەكگرتووەكان ئاشكرای دەكات، زیاتر لە دووهەزار و 500 منداڵی كەرتی غەززە، پێویستییان بە چارەسەری پزیشكی خێرا هەیە.

وێنە گەورەكە: دوای بەردەوامبوونی جەنگ بۆ ماوەی 15 مانگ كە دەیان هەزار کەس کوژران و بریندار بوون، لە ڕۆژی 2025-1-19، ئاگربەستی غەززە لەنێوان ئیسرائیل و حەماس كەوتە بواری جێبەجێكردنەوە، ماوەی قۆناغی یەكەمی ئاگربەستەكە 42 ڕۆژە، بەمەش بوار ڕەخساوە بۆ گەڕانەوەی ئاوارەكان و چوونی تیمەكانی فریاگوزاری بۆ بەدەنگەوەهاتنی بریندار و نەخۆشەكان.

ڕاگەیێنراوی فەرمی: ئەنتۆنیۆ گۆتێرس، ئەمینداری گشتیی نەتەوە یەكگرتووەكان، لە ئەژماری فەرمی خۆی لە تۆڕی كۆمەڵایەتی 'ئێكس' ڕایگەیاندووە، پێویستە فریاگوزاری پزیشكی خێرا بە هەزاران منداڵی كەرتی غەززە بگەیێندرێت، هاوكات گەرەنتی گەڕانەوەی ئەو منداڵانە بكرێت بۆ نێو خانەوادە و كۆمەڵگەی خۆیان.

زانیاریی زیاتر: گۆتێرێس ستایشی ڕۆڵی تیمی پزیشكان دەكات كە لەماوەی ڕابردوودا خۆنەویستانە كاریان بۆ چارەسەركردنی نەخۆش و بریندارەكان و گواستنەوەی تەرمەكان كردووە.