سزاکانی ترەمپ بۆ کەنەدا و مەکسیک دەبێتە دەرفەت بۆ نەوتی کوردستان و عێراق

 

ئاڤا نیوز

پاڵاوگەکانی ئەمریکا بیر لە کڕینی نەوت لە عێراق دەکەنەوە، ئەمەش دوای سەپاندنی پێناسی گومرگی لەلایەن ترەمپ بۆ کەنەدا و مەکسیک.

چیرۆکی سەرەکی: پێناسی گومرگی لەلایەن دۆناڵد ترەمپ، سەرۆکی ئەمریکا بۆ سەر هاوردەکانی کەنەدا و مەکسیک دەبێتە هەڕەشە لەسەر 4 ملیۆن و 500 هەزار بەرمیل نەوتی هاوردەکراوی رۆژانە لە کەنەدا و مەکسیک.

ئەوەی لەبارەیەوە دەگوترێت: بەشداربووانی بازاڕ دەڵێن، پاڵاوگەکانی نەوتی ئەمریکا چاویان لە ئەمریکای لاتین و ڕۆژهەڵاتی ناوەڕاست دەبێت بۆ ئەوەی جێگەی نەوتی خاوی کەنەدا و مەکسیک بگرێتەوە، کە دوای پێناسی گومرگی دۆناڵد ترەمپ، تێچوونەکانیان بەشێوەیەکی خێرا و لەناکاو بەرزبووەتەوە.

زانیاری زیاتر: بازرگانان ئاماژەیان بەوەشکردووە، پێدەچێت پاڵاوگەکانی ئەمریکا ڕوو لە نەوتی خاوی جێگرەوە بکەن وەک نەوتی قورس کە لەلایەن وڵاتانی دراوسێی وەک بەرازیل و گویاناوە بەرهەمدەهێنرێت بە لەبەرچاوگرتنی مەودای تاڕادەیەک نزیک.

ئەمەش بزانە: یەکێک لە بژاردەکان ئەوەیە ڕەنگە پاڵاوگەکانی ئەمریکا هەوڵی بەدەستهێنانی نەوتی خاو بدەن لە وڵاتانی وەک عێراق و هەرێمی کوردستان کە لەلایەن سۆمۆوە دەفرۆشرێت، هەرچەندە ڕێژەیەکی سنوورداری هەبێت لە بەرهەمهێنان، بەڵام دەتوانێت هەناردەی هەر شوێنێکی جیهان بکرێت. ئەمە لەکاتێکدایە ئیدارەی ترەمپ بەلایەوە گرنگە بەزووترین کات هەناردەی نەوتی کوردستان دەستپێبکاتەوە.