دۆناڵد ترەمپ سوورە لەسەر لکاندنی کەنەدا بە ئەمریکاوە

ئاڤا نیوز

 

ڕۆژی یەکشەممە، سەرۆکی ویلایەتە یەکگرتووەکانی ئەمریکا لە چاوپێکەوتنێکدا، هەڵوێستی خۆی سەبارەت بە لکاندنی کەنەدا بە ئەمریکا دووپاتکردەوە.

 

وێنە گەورەکە:  لە خولی یەکەمی سەرۆکایەتیی ترەمپدا، پەیوەندییەکی باش لەنێوان ترەمپ و ترودۆدا نەبوو،  گرژییەکانی نێوان هەردوولاش سەبارەت بە پرسی ماددەی هۆشبەر و کۆچبەرە نایاساییەکانن، ترەمپ هەڕەشەی سەپاندنی 25% باجی لەسەر هاوردەکانی کەنەدا کردووە، ئێستاش دەیەوێت ئەو وڵاتە بکاتە ویلایەتێکی ئەمریکا.

لێدوانی فەرمی: دۆناڵد ترەمپ،  سەرۆکی ویلایەتە یەکگرتووەکانی ئەمریکا ڕایگەیاند: "پێموایە کەنەدا زۆر باشتر دەبێت ئەگەر ببێتە ویلایەتی 51ی ئەمریکا، چونکە ساڵانە 200 ملیار دۆلار زیانمان هەیە لەگەڵ کەنەدا بەڵام من ڕێگە نادەم ئەوە ڕووبدات، ساڵانە 200 ملیار دۆلار دەدەینە کەنەدا وەک یارمەتی''.

 

لەلایەکی دیکەوە: جەستن ترودۆ، سەرۆکوەزیرانی کەنەدا ڕایگەیاند، ترەمپ بەردەوامە لە هەوڵەکانی بۆ دانانی کەنەدا وەک ویلایەتێکی ئەمریکا بۆ دەستگەیشتن بە سامانە سروشتییەکانی وڵاتەکەمان.