وەزیری بەرگری ئەمریکا: ترەمپ خیانەت لە ئۆکراینا ناکات

ئاڤا نیوز

پیت هێگسێت، وەزیری بەرگری ئەمریکا ڕایگەیاند، دانووستانەکانی دۆناڵد ترەمپ لەگەڵ ڤلادیمێر پوتن بۆ دەستپێکردنی دانووستانەکان و کۆتاییهێنان بە شەڕی ئۆکراینا "خیانەت نییە" لە کیێڤ.

چیرۆکی سەرەکی: ترەمپ لە چەند ڕۆژی ڕابردوو گوتی کە بە تەلەفۆن قسەی لەگەڵ پوتن کردووە، پوتن"نایەوێت چیتر خەڵک بەهۆی شەڕەوە گیان لەدەست بدەن"، هیوای خواست خێراتر شەڕی سێ ساڵەی ڕووسیا و ئۆکراینا کۆتایی بێت.

لێدوانی فەرمی: هێگسێت پێش کۆبوونەوەی وەزیرانی بەرگری ناتۆ سەبارەت بە هەوڵەکانی ترەمپ بۆ دانووستان لەگەڵ ڕووسیا گوتی:  ئەوەی سەرۆک ترەمپ دەیکات هیچ خیانەتێک نییە، جیهان و ئەمریکا ئارەزووی ئاشتی  و دانووستانیان هەیە، وەک ترامپ وتویەتی " کۆتاییهێنانە بە کوشتن".

ئەوەی پێویستە بیزانیت: ترەمپ لە کاتی کەمپەینەکانی هەڵبژاردنی سەرۆکایەتی ئەمریکا، بەڵێنی دا کۆتایی بە شەڕی نێوان ڕووسیا و ئۆکراینا بێنێت، هەر لەو چوارچێوەیەدا هەوڵەکانی بۆ دانووستان چرکردووەتەوە.