ئومێد خۆشناو: 59 پاڵاوگەی نایاسایی داخراون و 28 خاوەن پاڵاوگەش دەستگیر كراون

ئاڤا نیوز

ئومێد خۆشناو، پارێزگاری هەولێر، لە كۆنفڕانسێكی ڕۆژنامەوانیدا چەند ئامارێكی سەبارەت بە سەرپێچییە ژینگەییەكان و سزادانی سەرپێچیكاران ئاشكرا كرد.

وێنە گەورەکە: ڕۆژی 2025-01-12، سەرۆکوەزیران مەسرور بارزانی، لە كۆبوونەوەیەكی تایبەتدا لەگەڵ لایەنە پەیوەندیدارەكان سەبارەت بە چارەسەرکردنی کێشەی پیسبوونی ژینگەی هەوایی، چوار بڕیاری دا كە تایبەت بوون بە كاركردنی پاڵاوگەكان و مۆلیدەی گەڕەكەكان و بەرهەمهێنانی سەوزە لەڕێگەی ئاوی پیس، دوای ئەوە هەوڵەكانی لایەنە پەیوەندیدارەكان بۆ ڕێگری لە پیسبوونی ژینگە چڕتر بوونەوە و لە ماوەی مانگێكدا چەندین كەس سزا دراون.

لێدوانی فەرمی: ئومێد خۆشناو، پارێزگاری هەولێر لە کۆنگرەیەکی ڕۆژنامەوانیدا ڕایگەیاند:

- چەندین جار ڕامانگەیاندووە و دووپاتی دەكەینەوە، ئەو پاڵاوگانە ئێستا دروست نەبوون، بەڵكو چەندین ساڵە هەن و ئەو دۆخە نەخوازراوەی لە هەرێمی كوردستان هەبووە هۆكاری دەستبەكاربوونیانن، پلانێكمان هەیە و ئەو پاڵاوگانە دەگوزارێنەوە دەرەوەی شارەكان و شوێنی تایبەتیان بۆ دیاری دەكرێت و ئەوانەی مەرجەكانیان تێدایە مۆڵەتیان پێدەدرێت.

- ئەو پاڵاوگانە بەشێكن لە هۆكاری پیسبوونی ژینگە و ڕێوشوێنەكان بەردەوامن، لە ڕابردوو 138 پاڵاوگەی نایاسایی هەبوون، نیوەیان لە ساڵانی ڕابردوو داخران و ئەوەی لەو ماوەیەشدا داخراون بریتین لە 59 پاڵاوگە و 28 خاوەن پاڵاوگەش دەستگیركراون و ئێستا لە زیندانن.

- مۆلیدەی گەڕەكەكانیش هۆكارێكن بۆ پیسكردنی ژینگە، 145 خاوەن مۆلیدە ئاگاداركراونەتەوە و بەڵێننامەیان لێوەرگیراوە و دەبێت گرفتەكانیان چارەسەر بكەن، نۆ خاوەن مۆلیدە سزای دارایی دراون، 7 خاوەن مۆلیدە دراونەتە دادگا و دەستگیردەكرێن، 11 خاوەن مۆلیدەش گرفتەكانیان چارەسەركردووە، پێنج كارگەی شیش گرفتیان هەبووە ئاگاداركراونەتەوە ، كارگەیەكی دیكەش بە هۆی سەرپێچییەوە خاوەنەكەی دراوەتە داگە.

- چێشتخانە گەورە و میللییەكانیش ئاگاداركراونەتەوە كە پابەندی ڕێنماییە ژینگەییەکان بن و لە ماوەیەكی كورتدا گرفتەكانیان چارەسەر بكەن.

- لە دەوروبەری شاری هەولێر كەسانێك هەبوو لە درەنگانی شەو یان بەرەبەیان تایەی ئۆتۆمبێلیان بۆ دستكەوتنی پارە دەسووتاند، بەدواداچوونمان كرد و پێنج كەس كە وەك تیم ئەو كارەیان كردبوو دەستگیر كران.