وەزیری دەرەوەی تورکیا: نەمانی پەکەکە لە بەرژەوەندی عێراق و کورد دایە

ئاڤا نیوز

وەزیری دەرەوەی تورکیا ڕایدەگەیێنێت، کۆتاییهێنان بە پەکەکە لە بەرژەوەندی عێراق و کورد و سووریایە بە گشتی. هاوکات پێیوابوو وڵاتەکەی "سەرکردایەتییەکی باشی" لە دژی تیرۆر لە عێراق پیشانداوە.

وێنە گەورەکە: تورکیا نایەوێت چەکدارانی پەکەکە لە سووریا و بەتایبەت لە نزیک سنوورەکانی بمێننەوە و دەیەوێت وڵاتەکە بەجێبهێڵن، هاوکات ڕووبەڕووبوونەوەی هێزەکانی سووریای دیموکرات "هەسەدە" و هێزەکانی نزیک لە تورکیا لە مەنبج و بەنداوی تشرین بەردەوامە.

لێدوانی ڕۆژنامەوانی: هاکان فیدان، وەزیری دەرەوەی تورکیا بە میدیای وڵاتەکەی ڕاگەیاند:

- ئیدارەی نوێ لە سووریا ئێستا کار لەسەر دۆسیە زۆر سەختەکان دەکات، کۆتاییهێنان بە پارتی کرێکارانی کوردستانیش یەکێکە لە کارە لە پێشینەکانی.

- پێویستە لە پێناو عێراق و کورد و تورکیا و سووریا لە "پەکەکە" ڕزگارمان ببێت.

- پەکەکە تەنیا تورکیا ناکاتە ئامانج، بەڵکو ئێران، عێراق و سووریا دەکاتە ئامانج.

ئەوەی پێویستە بیزانیت: ئەو گوتانەی فیدان لە کاتێکدایە، وەزیرانی دەرەوەی سووریا و تورکیا لە میانی بەڕێوەچوونی پانێڵێک لە "کۆنفرانسی ئاسایشی میونشن" داوایان لە هەموو هێزە چەکدارەکانی سووریا کرد چەکەکانیان ڕادەستی حکومەتی نوێی سووریا بکەن.