لەکاتی مەراسیمی بەخاکسپاردنی حەسەن نەسروڵڵا ئیسرائیل هێرشی کردە سەر لوبنان

ئاڤا نیوز

سوپای ئیسرائیل ئەمڕۆ یەکشەممە لەگەڵ مەراسیمی بەخاکسپاردنی حەسەن نەسروڵلا و هاشم سەفیەدین هێرشی کردە سەر لوبنان، هەروەها میدیاکانی لوبنان بڵاویان کردەوە کە فڕۆکە جەنگییەکانی ئیسرائیل لە کاتی مەراسیمەکەدا بە ئاسمانی بەیرووتدا سوڕاونەتەوە.

وێنە گەورەکە: ئەمڕۆ مەراسیمی بەخاکسپاردنی حەسەن نەسروڵڵا ئەمینداری گشتی حیزبوڵڵا و هاشم سەفیەدین لە یاریگایەکی دەرەوەی بەیرووت بەڕێوەچوو سەرەتای مەراسیمەکە پەیامی عەلی خامنەیی، ڕیبەری باڵای ئێران خوێندرایەوە کە بە وشەیەک پەیامێکی ئاڕاستەی دوژمنانی کرد و گوتی "بەرخۆدان کۆتایی نەهاتووە".

زانیاریی زیاتر: مەسعود پزیشکییان، سەرۆککۆماری ئێران ئامادەیی خۆی بۆ بەشداریکردن لە مەراسیمەکە ڕاگەیاندبوو، بەڵام حکومەتی لوبنان داوەتنامەی بۆ نەناردبوو، هەروەها ئامادەبوونی محەمەد باقر قالیباف، سەرۆکی ئەنجومەنی ڕاوێژکاری ئیسلامی ئێران لەسەر بانگهێشتی نەبیح بێری سەرۆکی پەرلەمانی وڵاتی لوبنان بوو.

باکگراوند: یەکێک لە گەورەترین و کاریگەرترین هێرشە ئامانجدارەکانی ئیسرائیل لەم ساڵانەی دواییدا بەئامانجکردنی بارەگاکانی حیزبوڵڵا بوو لە 28ـی ئەیلولی ساڵی ڕابردوو.