عێراق کۆنتڕۆڵکردنی تەواوەتی ڤایرۆسی دەم و پەلەکانی ئاژەڵان ڕادەگەیێنێت

ئاڤا نیوز

 

وەزارەتی کشتوکاڵی عێراق ڕایگەیاند، لە چەند ڕۆژی ڕابردوودا هیچ حاڵەتێکی توشبوون بە ڤایرۆسی دەم و پەلەکانی ئاژەڵ لەناو ئاژەڵاندا تۆمارنەکراوە و ئێستا پەتاکە بە تەواوی کۆنتڕۆڵکراوە.

 

ئەوەی پێویستی بیزانیت: ناوەڕاستی مانگی ڕابردوو لە بەغدا و سێ پارێزگای دیکە هەزاران ئاژەڵ و بەتایبەتیش گامێش، توشی ڤایرۆسی دەم و پەلەکانی ئاژەڵ بوون و بەهۆیەوە زیاتر لە 600 ئاژەڵ مرداربوونەوە، بەوتەی بەرپرسانی ڤێرتێرنەریش پەتاکە بەهۆی دابەزینی پلەکانی گەرماوە تووشی ئاژەڵان بووە.

 

ڕاگەیێنراوی فەرمی: مەهدی جبوریی، بریکاری وەزارەتی کشتوکاڵی عێراق بۆ ئاژانسی هەواڵی فەرمی (واع)ی ڕاگەیاندووە:

 

- لەگەڵ بڵاوبوونەوەی ڤایرۆسەکە، دژەڤایرۆسمان بێبەرامبەر بەسەر خاوەن ئاژەڵەکاندا دابەشکرد و ئەو شوێنانەی توشبوون تیایدا هەبوو، کەرەنتین کران.

 

- لە چەند ڕۆژی ڕابردوودا هیچ حاڵەتێکی نوێی توشبوون بەو پەتایە تۆمارنەکراوە و نرخی گۆشتیش ئاسایی بووەتەوە، دوای ئەوەی بەرپرسانی تەندروستی دڵنیاییاندا کە پەتاکە کاریگەری لەسەر گۆشتی ئاژەڵەکان نییە و خواردنی گۆشتەکەی ئاساییە.

 

- تووشبوون بە نەخۆشییەکە کۆتاییهاتووە و پەتاکە بە تەواویی کۆنتڕۆڵکراوە.