لە هەولێر خواردن بۆ شێڵتەری سەگی بێلانە دابین دەکرێت

ئاڤا نیوز

 

بەهۆى دابینکردنى خۆراک بۆ شێڵتەری کۆکردنەوەی سەگى بێلانە، پارێزگاری هەولێر سوپاسی چوار کۆمپانیا دەکات.

 

چیرۆکی سەرەکی: ماوەی ساڵێکە شێڵتەری کۆکردنەوەی سەگی بێلانە لە هەولێر دروستکراوە، لە پاى دابینکردنی خۆراکیش بۆ سەگە بێلانەکان، ئومێد خۆشناو، پارێزگاری هەولیر سوپاس و پیزانین پێشکەش بە چوار کۆمپانیاى دەکات کە گۆشت بۆ ئەو شێڵتەرە دابین دەکەن.

 

زانیاریی زیاتر: لەم ماوەیەدا زیاتر لە 14 هەزار سەگ لەو شێڵتەرە کۆ کراونەتەوە، دوو هەزار سەگیان هی دەرەوەى شار بووە و ڕۆژانە حەوت تەن خواردنیان پێدەدرێت، پڕۆسەى کۆکردنەوەی سەگى بێلانە و گواستنەوەیان بۆ شێڵتەر بەردەوامە، بۆ باشتر بەڕێوەچوونى کارەکانیشیان دوو ئۆتۆمبێلى تازە بۆ تیمەکانى شێڵتەرەکە دابینکراوە.

 

باکگراوند: بە گوژمەى 450 ملیۆن دینار، لە سەر ڕووبەرى 20 دۆنم زەوی و بە دوورى 15 کیلۆمەتر لە ناوەندی شارى هەولێر، پارێزگای هەولێر لەسەر بودجەی پەرەپێدان شێڵتەرێکى تایبەت بە کۆکردنەوی سەگى بێلانەی دروستکرد.