مەلا یاسین: وەبەرهێنەرانی کوردستان 530 ملیۆن دۆلار زەكاتیان لەسەرە

ئاڤا نیوز

وتەبێژی یەکێتی وەبەرهێنەرانی كوردستان دەڵێت، "ئێمەی وەبەرهێنەرانی كوردستان 530 ملیۆن دۆلار زەکاتمان لەسەرە، ئەگەر ئەو بڕە ببەخشین، ئەوەی هەژار بێت لە كوردستان نامێنێت."

وێنە گەورەكە: ساڵانە لە مانگی پیرۆزی ڕەمەزاندا، موسوڵمانان لە سامانەكانیان زەكات دەدەن كە بۆ هەر ملیۆنێك دینار بڕی 25 هەزار دینار دیاریكراوە، بەو مەرجەی ئەو سامانە ساڵێكی بەسەردا تێپەڕبووبێت.

لێدوانی فەرمی: مەلا یاسین، وتەبێژی یەکێتی وەبەرهێنەرانی كوردستان بە ئاڤای ڕاگەیاند، "ئەگەر سەرجەم سەرمایەدار و وەبەرهێنەرانی كوردستان، وەك خۆی پابەندی فەرز و ئەركە ئایینیەكان بن، ئەوا بەپێی لێکدانەوە وردەكانم؛ ئێمەی سەرجەم وەبەرهێنەران بڕی 530 ملیۆن دۆلار زەكاتمان لەسەرە، ئەگەر ئەو بڕە ببەخشین، خەڵكی هەژار لە كوردستان نامێنن. بەو پێیەی زیاتر لە 100 هەزار هاووڵاتیی هەرێمی كوردستان لەژێر هێڵی هەژاری دان."

ئەوەی پێویستە بیزانیت: پاڵپشت بەو لێدوانەی وتەبێژی وەبەرهێنەرانی كوردستان؛ ئاڤا لێکدانەوەیەکی وردی كردووە بۆ ئەوەی بزاندرێت كۆی داهاتی وەبەرهێنەرانی كوردستان چەندە، تا بڕی 530 ملیۆن دۆلار زەكات بدەن، وەك دەزانن بڕی دیاریكراو بۆ زەكات لە سەدا 2.5ـە، بەپێی ئەو ڕێژەیەش بێت كۆی داهاتی وەبەرهێنەران زیاتر لە 21 ملیار دۆلارە.