عەلی خامنەیی: پێشکەوتنەکانمان دوژمنی هەراسان و توڕە کردووە

ئاڤا نیوز

دوای ئەنجامدانی دانوستانەکانی نێوان ئەمریکا و ئێران، ڕێبەری باڵای کۆماری ئیسلامی ئێران دەڵێت دوژمنەکانمان چاویان بە سەرکەوتنەکانمان هەڵنایەت.

چیرۆکی سەرەکی: دوای تێپەربوونی 24 کاتژمێر بەسەر گەڕی یەکەمی دانوستانەکانی نێوان ئێران و ئەمریکا، عەلی خامنەیی، ڕێبەری باڵای کۆماری ئیسلامی ئێران لەگەڵ ژمارەیەک لە فەرماندەکانی هێزە چەکدارەکانی وڵاتەکەی کۆبووەوە و گوتی دوژمنانمان چاویان بە سەرکەوتنەکانماندا هەڵنایەت.

لێدوانی فەرمی: عەلی خامنەیی، ڕێبەری باڵای کۆماری ئیسلامی ئێران ڕایگەیاند:

٠ پێشکەوتنەکانی ئێمە بووەتە هۆی نائارامی و هەراسان بوون و توڕەبوونی دوژمنانمان.

٠ ئەوەی کە دوژمنان توڕە و هەستیار دەکات وشەی کۆماری ئیسلامی ئێران نییە، بەڵکو پشت نەبەستنمانە بە وڵاتانی دیکە.

٠ ئەمڕۆ وڵات لە هەموو ڕوویەکەوە پێشکەوتووە بۆیە دوژمنان حەز بە بینینی سەرکەوتنەکانمان ناکەن.

زانیاریی زیاتر: پێشتر عەلی خامنەیی وتبووی دانوستان لەگەڵ ئەمریکا کارێکی ئابڕووبەرانە و نا هۆشیارانەیە.