لیژنەی نەوت و گاز: ڕاگرتنی هەناردەی نەوتی كوردستان، عێراقی لە بازاڕەكانی ئەوروپا دابڕاندووە

ئاڤا نیوز

جێگری سەرۆكی لیژنەی نەوت و گاز لە پەرلەمانی عێراق ڕایدەگەیەنێت، ڕاگرتنی هەناردەی نەوتی هەرێمی كوردستان لەڕێگەی بەندەری جەیهانەوە، عێراقی لە بازاڕەكانی ئەوروپا دابڕاندووە.

وێنە گەورەکە: سەرەڕای ئەوەی لە سەرەتای ئەمساڵ یاسای بودجەی عێراق هەمواركرایەوە كە ماددەیەكی هەموارەكە پەیوەستە بە دەستپێكردنەوەی هەناردەكردنی نەوتی هەرێمی كوردستان، بەڵام تائێستا تێبینی كۆمپانیا نەوتییەكان بووەتە گرفتێكی تەكنیكی لەبەردەم دەستپێكردنەوەی هەناردەی نەوتی هەرێم.

لێدوانی فەرمی: عەدنان جابری، جێگری سەرۆكی لیژنەی نەوت و گاز لە پەرلەمانی عێراق لە لێدوانێكی بۆ ئاژانسی هەواڵی سۆمەریە نیوز ڕایگەیاند، فرەچەشنكردنی كەناڵەكانی فرۆشتنی نەوتی عێراق، بۆ ئابووریی وڵات گرنگە و پشتبەستن بەیەك دەرچەی بەبازاڕكردنی نەوت، زیانی گەورەی لێدەكەوێتەوە و دەبێتە هۆی لەدەستدانی كڕیار.

زانیاریی زیاتر: بە گوتەی ئەو پەرلەمانتارە زیاتر لە دوو ساڵە بەهۆی وەستاندنی هەناردەكردنی نەوتی هەرێمی كوردستان لەڕێگەی بەندەری جەیهانی توركیەوە، عێراق لە بازاری وزەی ئەوروپا دابڕاوە، ئەوەش زیانی گەورە لە ئابووریی عێراق دەدات.

ئەوەی پێویستە بیزانیت: سبەی کۆبوونەوەیەکی سێ قۆڵی لەنێوان هەردوو حکومەتی فیدڕاڵ و هەرێمی کوردستان و نوێنەری کۆمپانیاکانی بەرهەمهێنەری نەوت لە کوردستان (ئەپیکۆر) لە بەغدا بەڕێوەدەچێت بەمەبەستی چارەسەرکردنی ناکۆکییەکان.