دوای مردنی پاپا فڕانسیس، چۆن پاپای نوێی ڤاتیکان هەڵدەبژێردرێت؟

ئاڤا نیوز

دوای کۆچی دوایی پاپا فرانسیس، پاپای ڤاتیکان و ڕێبەری کاسۆلیکەکانی جیهان ئێستا چاوەکان لەسەر ڤاتیکانن کە پاپای نوێ کێ دەبێت.

وێنەگەورەکە: ئەمڕۆ دووشەممە 2025-04-21، پاپا فرانسیس، پاپای ڤاتیکان دوای تووشبوونی بە نەخۆشی هەوکردنی سییەکان لە تەمەنی 88 ساڵیدا کۆچی دوایی کرد.

ئەوەی ئێستا ڕوودەدات: دوای مردنی پاپا، تەرمەکەی دەگوازرێتەوە بۆ شەقامی سانت پیتەر لە ڤاتیکان کۆمەڵێک رێورەسمی ئاینی چڕ بەڕێوەدەچن و سەرۆک و سەرکردە و کەسایەتی ئاینی جیاوازی جیهان ئامادەیی ئەم مەراسیمە دەبن و لە زۆربەی وڵاتان پرسەی گشتیی ڕادەگەیێنرێت.

شێوازی جێبەجێکردن: سەرەتا دوای ئەوەی پزیشکەکان هەواڵی مردنی رادەگەیەنن، کەسێک کە بە خزمەتکاری ژوور دەناسرێت، دەچێتە لای پاپا و بانگی دەکات هەڵبستێتەوە، دوای ئەوەی هیچ ئەنجامێکی نابێت، ڤاتیکان بە ڕەسمی هەواڵی مردنەکە رادەگەیەنێت، هەر راستەوخۆ دوای ئەوە ئەو ئەڵقەیەی پاپا کە وەک مۆر و واژۆ بەکاردێت دەشکێنرێت و نۆ رۆژ پرسە رادەگەیەندرێت.

ئەوەی پێویستە بیزانیت: ساڵی رابردوو پاپا فرانسیس، واژۆی لەسەر ڕێوشوێنەکانی بەخاکسپاردنی خۆی کرد، ئاسانکاری لە هەندێک لە ڕێورەسمەکانی ئەو بۆنەیەدا کرد و بەشێکی دیکەشی زیادکرد.

دوای مردنی پاپا فڕانسیس کێ دەبێتە پاپای ڤاتیکان و چۆن هەڵدەبژێردرێت؟

دوای تەواوبوونی ڕێکارەکانی ناشتنی پاپا، ئامادەکاریی بۆ هەڵبژاردنی پاپای نوێ دەکرێت. کاردیناڵەکانی کاسۆلیک لە کەنیسەی سیستین لە ڤاتیکان کۆدەبنەوە و لە کەنیسەکە نایەنە دەرەوە هەتا کەسێک بۆ شوێنگرەوەی پاپا هەڵنەبژێرن، تەنانەت ئەگەر چەند رۆژ و هەفتەیەکیشیان پێبچێت.

زانیاریی زیاتر: ژمارەیەک لە کاردیناڵی کاسۆلیک ناویان وەک بەربژێری شوێنگرەوەی پاپا فرانسیس هاتووە، کە کاردینال بارۆلین، ئەمینداری نهێنی ڤاتیکان، پیتەر ئێردۆ کە پێشتر سەرۆکی کۆنگرەی قەشەکانی ئەوروپا، لویس ئەنتۆنیۆ تاگل کە بەرەگەز فلیپینییە، ماتیۆ زوبی سەرۆکی ئەنجومەنی قەشەکانی ئیتاڵیا لە دیارترینیانن.

ئەو کەسەی وەک پاپای نوێی ڤاتیکان هەڵدەبژێردرێت، پێویستە لە 252 کاردیناڵ 138ـیان لە دەنگدانێکی نهێنیدا دەنگ بدەن و لەو ژمارەیەش دوو لەسەر سێی دەنگەکان بەدەستبهێنێت.

گۆشەیەکی دیکەی دیمەنەکە: لەو ماوەیەی کاردیناڵەکان لە کەنیسەی سیستین دەمێننەوە، رۆژانە دەنگدانەکان دووبارە دەکەنەوە تا بە مەبەستەکەیان دەگەن، بۆ هەر جارێکیش دوای تەواوبوونی پڕۆسەی دەنگدان کاغەزی دەنگدانەکان دەسوتێنن و دووکەڵی ڕەش لە دوکەڵکێشی کەنیسەکە دەردەچێت، بەڵام دواجار کە بەربژێرەکە توانی دەنگی پێویست بهێنێت کاغەزی دەنگدانەکە دەسووتێنرێت و دوکەڵێکی سپی لێوەدەردەچێت وەک ئاماژەیەک بۆ سەرکەوتنی پڕۆسەکە و  ناوی پاپای نوێ لە ڤاتیکانەوە بە ئامادەبوونی خەڵکی وڵاتە ڕادەگەیێنرێت.