وەزیری تەندروستیی لیبیا بەهۆی هاوردەکردنی دەرمانی عێراقییەوە دووردەخرێتەوە

ئاڤا نیوز

بەهۆی ئەوەی دەرمانی عێراقی تایبەت بە چارەسەری شێرپەنجەی هاوردە کردووە، سەرۆکوەزیرانی لیبیا، وەزیری تەندروستی وڵاتەکەی و ژمارەیەک بەرپرسی دیکەی لە پۆستەکانیان دوورخستەوە.

 

ئەوەی پێویستە بیزانیت: 27ی ئەم مانگە وەزارەتی تەندروستیی عێراق ڕایگەیاند، بۆیەکەمجار کاروانێکی دەرمانی تایبەت بە چارەسەری شێرپەنجەیان ڕەوانەی لیبیا کردووە و سەرجەم دەرمانەکانیش بەرهەمهێنراوی ناوخۆن.

 

کاریگەریی و لێکەوتەکان: دەستەی نیشتمانیی تایبەت بە ڕووبەڕووبوونەوەی شێرپەنجە لە لیبیا ئاشکرای کرد کە ئەوان بەرپرس نین لە هێنانی ئەو دەرمانانە، چونکە ئەوان تەنیا لە سەرچاوەی ئەمریکی و ئەوروپییەوە دەرمانی تایبەت بە شێرپەنجە هاوردە دەکەن و سەرجەمیشیان باوەڕپێکراوی نێودەوڵەتین.

 

ڕاگەیێنراوی فەرمی: عەبدولحەمید دەبیبە، سەرۆکی حکومەتی یەکێتیی نیشتمانی لە لیبیا (کە حکومەتێکی دانپێدانراوە لە ئاستی نێودەوڵەتی)، ڕۆژی سێشەممە ڕەمەزان ئەبوجناح وەزیری تەندروستیی حکومەتەکەی و پێنج بەرپرسی دیکەی تەندروستیی لیبیای لە پۆستەکانیان دوورخستەوە، دوای ئەوەی دەرکەوت ئەوان بەرپرسی ڕاستەوخۆی هاوردەکردنی دەرمانەکانی عێراق بوون، لەکاتێکدا ئەم بابەتە پسپۆڕی ئەوان نەبووە و ئەوە کاری دەستەی نیشتمانی تایبەت بە ڕووبەڕووبوونەوەی شێرپەنجەیە.

 

ئەمەش بزانە: ئێستا چارەنوسی ئەو بارهەڵگرە دیارنییە کە دەرمانی عێراقی بۆ لیبیا بردووە، لەو وڵاتەش مەترسییەکان لەسەر ساغکردنەوەی دەرمانی دەرەوەی کوالیتی بەتایبەتیش دەرمانی هاوردەکراو لە هیندستان، تورکیا، قوبرس و ماڵتا زیاتربوون، لە دەرئەنجامیشدا چارەخوازەکانی تووشی نەخۆشی دیکە کردووە.