کەشناسیی عێراق: خۆڵبارین تاوەکو مانگی هەشت بەردەوام دەبێت

ئاڤا نیوز

 

چەند ڕۆژێکە شەپۆلێکی چڕی خۆڵبارین زۆربەی پارێزگاکانی عێراقی بە بەغدای پایتەختەوە گرتووەتەوە، دەستەی گشتیی کەشناسی و چاودێریی بومەلەرزەی عێراقیش وادەی کۆتاییهاتنی خۆڵبارینی ئاشکراکرد.

 
وێنە گەورەکە: عێراق یه‌كێكه‌ له‌و وڵاتانه‌ی زۆرترین زیانی گۆڕانکاری کەشوهەوای بەرکەوتووە، بەو هۆیەشەوە ساڵانە خۆڵبارینی چڕ ڕوو لە زۆربه‌ی پارێزگاکانی ناوەڕاست و باشوور دەکات.

 

لێدوانی تایبەت: عامر جابری، گوتەبێژی دەستەی گشتیی کەشناسی و چاودێریی بومەلەرزەی عێراق هۆکاری ئەم شەپۆلە خۆڵبارینەی بۆ ئاڤا میدیا ڕوونکردەوە و ڕایگەیاند: گۆڕانکاریی کەشوهەوا، کەمی ڕێژەی بارانبارین، کاریگەری زریانی تۆز و با کە لە باکووری ئەفریقیاوە ڕوو لە عێراق دەکات و خێرایی با لە بیبانەکان، وادەکات تۆز و خۆڵ لە ناوچەکانی ناوەڕاست و باشوور بەرز ببێتەوە، ئەمەش هۆکاری سەرەکی ئەم شەپۆلە چڕەی خۆڵبارینە لە زۆربەی ناوچەکانی عێراق.

 

ئەوەی پێشبینی دەکرێت: دەستەی گشتیی کەشناسی و چاودێریی بومەلەرزەی عێراق پێشبینی دەکات، خۆڵبارین تاوەکو کۆتایی مانگی ئابی داهاتوو بەردەوام بێت، بەڵام  بە ڕێژەیەکی جیاواز، هەندێک جار ڕێژەکەی لەوەی ئێستا کەمتر دەبێتەوە و هەندێک جاریش چڕتر دەبێت.

 

لەلایەکی دیکەوە: دەستەی کەشناسیی عێراق لایەنی پەیوەندیداری بەکەمتەرخەم زانی بۆ چارەسەرکردنی کێشەی خۆڵبارین کە هەموو ساڵێک ڕێژەکەی زیاتر دەبێت.

 

ئەمەش بزانە: لە بودجەی 2024، بڕی 10 ملیار و 800 ملیۆن دینار بۆ پاڵپشتی کەرتی ژینگە ته‌رخانكراوه‌  و بەسەر وەزارەتەکانی نەوت، کارەبا و ژینگەدا دابەشکراون .