کاروانێكی دیکەی سەربازیی "هاوپەیمانیی نێودەوڵەتی" لە سووریا بەرەو عێراق دەکشێتەوە

ئاڤا نیوز

هێزەکانی هاوپەیمانیی نێودەوڵەتی بە سەرۆکایەتیی ئەمریکا "گەورەترین" کاروانی سەربازیی لە سووریا بەرەو عێراق دەکشێنێتەوە.

وێنە گەورەکە: لە دوای ڕووخانی دەسەڵاتی بەشار ئەسەد لە سووریا و پێکهێنانی حکومەتی نوێ لەو وڵاتە، ئەمریکا کە سەرۆکایەتیی هاوپەیمانیی نێودەوڵەتی بۆ بەرەنگاربوونەوەی داعش لە عێراق و سووریا دەکات بڕیاریداوە هێزەکانی لە سووریا و ڕۆژئاوای کوردستان کەم بکاتەوە، لە ماوەی دوو هەفتەدا دوو کاروانی سەربازیی لەو وڵاتە کشاندووەتەوە.

زانیاریی بەدەستهاتوو: بەگوێرەی چەند سەرچاوەیەکی ناخۆی سووریا، کاروانێکی سەربازیی نوێی هێزەکانی "هاوپەیمانی نێودەوڵەتی" کە لە دەیان بارهەڵگری گەورە بە کەلوپەل و کەرەستەی قورسی سەربازی پێکهاتووە لە چەند بنکەیەک لەوانەش؛ بنکەکانی ئەلعومەر و کۆنیکۆ لە ڕۆژهەڵات و باکووری شاری دێرەزۆر بەرەو عێراق کشانەوە.

زانیاریی زیاتر:  پێشتر وەزارەتی بەرگریی ئەمریکا (پێنتاگۆن) ڕایگەیاند کە لە کۆی دوو هەزار و 500 سەربازەوە بۆ هەزار سەرباز کەمدەکاتەوە، لە کۆتایی مانگی ڕابردووشدا، سەدان بارهەڵگری سەربازی سەر بە هێزەکانی هاوپەیمانیی نێودەوڵەتیی سووریایان بەرەو عێراق بەجێهێشت.