ئەمریكا هۆكاری درێژكردنەوەی مۆڵەتی كڕینی وزەی ئێران لەلایەن عێراقەوە ئاشكرادەكات

ئاڤا نیوز

وەزارەتی دەرەوەی ئەمریکا هۆکاری لێخۆشبوون و پێدانی کاتی زیاتر بە عێراق بۆ کڕین و هاوردەکردنی غاز و وزە لە ئێرانەوە ئاشکرا دەکات، ئەوەش بە هەلێک دادەنێت تا عێراق هاوردە لە ئێرانەوە کەمتر بکاتەوە، بەشێوەیەک لە دەیەی ڕابردوودا بۆ نیوە کەم بووەتەوە.

لێدوانی فەرمی: ماتیۆ میلەر، گوتەبێژی وەزارەتی دەرەوەی ئەمریکا ڕایگەیاند: لێخۆشبوون بۆ عێراق لە کڕینی وزە لە ئێرانەوە دواین وادەی کۆتایی ئەم مانگەیەو چوار مانگی دیكەش درێژ دەكرێتەوە، دوای ئەوەی بۆ 21 جار درێژکرایەوە و بۆیەکەمجار لە ساڵی 2018 مۆڵەتی کڕینی وزە لەئێرانەوە بۆ عێراق درێژکرایەوە.

زانیاریی زیاتر: بەگوتەی ئەو بەرپرسەی ئەمریکا، ئەو پارەیەی ئێران لە فرۆشتنی وزە بە عێراق دەستیدەکەوێت ڕێگەی پێنادرێت بیاتەوە بۆ وڵاتەکەی، بەڵکو لە هەژمارێکدا پارێزراوە و تەنیا دەتوانرێت لە کڕینی ماددەی خۆراکی و دەرمان و ئامێری پزیشکی و کشتوکاڵی بەکاربهێنرێت جگە لەو پێداویستییانەی سزاکانی ئەمریکا نایانگرێتەوە، ئامانجەکەش ئەوەیە عێراق لەکڕینی وزە لە ئێران دووربکەوێتەوە. ماتیۆ میلەر وای گوتووە.

باکگراوند: عێراق لە ساڵی 2021دا 297 ملیار پێ سێجا غازی لە ئێرانەوە هاوردە کردووە، لە کاتێکدا لە ساڵی 2022دا 333 ملیار پێ سێجا و لە  2020دا 364 ملیار پێ سێجا غازی هاوردە کردووە.