لە هەولێر حەوت کەس لەسەر تای خوێنبەربوون دراونەتە دادگا

ئاڤا نیوز

ڕێکارەکانی خۆپارێزیی تایبەت بە تای خوێنبەربوون بەردەوامن و حەوت کەس بەهۆی پابەندنەبوون بە ڕێنماییەکان لێپێچینەوەی یاساییان لەگەڵ کراوە.

چیرۆکی سەرەکی: چەند مانگێکە تای خوێنبەربوون لە عێراق و هەرێمی کوردستان بڵاوبووەتەوە، ڤایرۆسەکە لەڕێگەی ئاژەڵەوە دەگوازرێتەوە و تاوەکو ئێستا 73 تووشبوو لە عێراق تۆمار کراون، 5 کەس بەهۆی ڤایرۆسەکەوە گیانیان لەدەست داوە، لە سنووری پارێزگای دهۆکیش ژنێکی تەمەن 45 ساڵ بەهۆی ڤایرۆسەکەوە گیانی لەدەست داوە.

لێدوانی فەرمی: ئەمڕۆ یەکشەممە 18-5-2025، ئومێد خۆشناو، پارێزگاری ھەولێر ڕایگەیاند: چەند حاڵەتێکی گوماناوی لەسەر تای خوێنبەربوون هەبوون، دوای پشکنینی پزیشکی دەرکەوت ئەو کەسانەی هەڵگری ڤایرۆسەکە نین.

- چەند کۆبوونەوەیەکی تایبەتیان سەبارەت بە ڕێگریکردن لە تای خوێنبەربوون کردووە، چەند ڕێنماییەکیان لەبارەی ڤایرۆسەکەوە بڵاوکردووەتەوە، داوا لە هاونیشتمانیان دەکات پابەندی ڕێنماییەکان بن و هیچ جۆرە گۆشتێکی سوور بەبێ مۆری ڤێتێرنەری نەکڕن.

- زیاتر لە حەوت کەسمان داوەتە دادگە کە گۆشتی سووریان دوور لە ڕێنماییەکان فرۆشتووە، دوو لەو کەسانە دەستگیرکراون و لێپێچینەوە لەگەڵ هەموو ئەو کەسانە دەکرێت کە بەشێوەی نایاسایی گۆشت دەفرۆشن.

ئەوەی پێویستە بیزانیت: ڕۆژی هەینی 02-05-2025، یەكەم حاڵەتی تووشبوون بە نەخۆشی تای خوێنبەربوون لە هەرێمی كوردستان تۆماركرا کە گۆشتفرۆشێکی تەمەن 45 ساڵی خەڵکی کۆیە بوو، ئێستا تەندروستیی جێگیرە و نێردراوەتەوە بۆ ماڵەوە.