پێنج کەس بەهۆی ئاگرەکەی سلێمانی دەستگیر دەکرێن

ئاڤا نیوز

بەتۆمەتی ئاگر کەوتنەوە ژمارەیەک هاووڵاتی لەلایەن پۆلیسی دارستان و ژینگەی سلێمانی دەستگیر دەکرێن و ڕێکاری یاساییان بەرامبەر دەگیرێتەبەر.

وێنە گەورەکە: بەهۆی کەمتەرخەمی هەندێک لە هاووڵاتیان لەکاتی پێگەیشتنی دانەوێلە، ڕووداوی ئاگرکەوتنەوە لەناو گەنمی جووتیاران کەوتەوە و زیان بە بەرهەمی گەنمی جووتیاران گەیشت، پۆلیسی دارستان و ژینگەی سلێمانی بەهۆی پابەندنەبوون بە ڕێنماییەکان و هۆکاری کەوتنەوەی ئاگر پێنج هاووڵاتی دەستگیر دکرد.

ڕاگەیێنراوی فەرمی: بەڕێوەبەرایەتیی پۆلیسی دارستان و ژینگەی سلێمانی ڕایگەیاند، بەهۆی پابەندنەبوون بەڕێنماییەکان و کەمتەرخەمی و هۆکار بۆ کەوتنەوەی ئاگر لە سنوری پارکی هەواری شار پێنج هاووڵاتیی لەلایەن بەشی پۆلیسی دارستان و ژینگەی سلێمانی دەستگیرکران.

- پەڕاوی لێکۆڵینەوەی بۆ تۆمەتباران ڕێکخراوە بۆ گرتنەبەری ڕێکاری یاسایی لەلایەن دادوەری لێکۆڵینەوە.

لەلایەکی دیکەوە: پۆلیسی دارستان و ژینگەی سلێمانی دەڵێت، "مەفرەزە هاوبەشەکانی بارەگای بەڕێوەبەرایەتیمان لەگەڵ بەشی پۆلیسی دارستانی سلێمانی و بنکەکانی بەردەوام لە بناری چیای گۆيژە و ئەزمەڕ ڕێنمایی هاووڵاتیان و گەشتیاران دەکەن کە ئاگر نەکەنەوە، لەپێناو پارێزگاری و پاراستنی ئەو زنجیرە چیایە لە سووتان".