لە شەش مانگدا زیاتر لە 27 هەزار دۆنم ڕەز و باغ و دارستان سووتاون

ئاڤا نیوز

 

بەگوێرەی ئامارێکی پۆلیسی دارستان و ژینگەی کوردستان، لە ماوەی شەش مانگی یەکەمی ئەمساڵ زیاتر لە 27 هەزار دۆنم لە دارستان و پاوان، پوش و پەلاش، ڕەز و باغ سووتاون.

 

وێنە گەورەکە: ساڵانە لە ناوەڕاستی وەرزی بەهار تا کۆتایی وەرزی پایز، ئاگرکەوتنەوە لە دارستان و پوش و پەلاش زیانی زۆر بەر ژینگە دەگەیەنن، ئەمساڵیش ژمارەیەک ئاگری گەورە لە چەند ناوچەیەکی کوردستان کەوتوونەتەوە و زیانی زۆریان بە سروشت و ژینگە گەیاندووە.

 

لێدوانی فەرمی: ڕائید فوئاد ئەحمەد زراری، بەڕێوەبەری ڕاگەیاندن لە پۆلیسی دارستان و ژینگەی هەرێمی کوردستان بە ئاڤا میدیای گوت، لە شەش مانگی یەکەمی ئەمساڵ زیاتر لە 27 هەزار دۆنم لە دارستان و پاوان، پوش و پەلاش، ڕەز و باغ لە ناوچەی جیاجیای هەرێمی کوردستان سووتاون.

 

ژمارەکان وادەڵێن: لە شەش مانگی یەکەمی ئەمساڵ 145 ڕووداوی ئاگر کەوتنەوە ڕوویانداوە و زیانەکانی بەم شێوەیە بووە:

- سووتانی ڕەز و باغ: 88 دۆنم.
- سووتانی دارستان و پاوان: 8 هەزار و 653 دۆنم .
- سووتانی پوش و پەلاش: 18 هەزار و 656 دۆنم. 
-کۆی گشتی : 27 هەزار و 397 دۆنم.