تەندروستیی هەولێر: عێراق خزمەتگوزاریی پزیشكی بە كەمپەكان ناگەیێنێت

ئاڤا نیوز

بەڕێوەبەرایەتیی تەندروستیی هەولێر، نەبوونی خزمەتگوزاریی پزیشكی و پێداویستی تەندروستیی نێو كەمپەكان بە وەزارەتی تەندروستیی عێراق دەگەیێنێت و داوای چارەسەریی پێویست دەكات.

چیرۆكی سەرەكی: ئەمڕۆ چوارشەممە 20ـی ئابی 2025، لە شاری هەولێر، دكتۆر دلۆڤان محەممەد، بەڕێوەبەری گشتیی تەندروستیی هەولێر، پێشوازی لە شاندێكی وەزارەتی تەندروستیی عێراق كرد، بە مەبەستی بەدواداچوون بۆ دۆخی پێشكەشكردنی خزمەتگوزاریی تەندروستی لە كەمپی ئاوارە و پەنابەران لە سنووری پارێزگای هەولێر.

لێدوانی فەرمی: د. دلۆڤان محەممەد، بەڕێوەبەری تەندروستیی هەولێر ڕایگەیاند، سەرەڕای گەڕانەوەی بەشێكی زۆری ئاوارەی نێو كەمپەكان بۆ زێدی خۆیان، بەشێكیان لەنێو كەمپەكان ماونەتەوە و ئێستا خزمەتگوزارییە پزیشكی و تەندروستییەكانیان وەك پێویست نین و سستی بە پرۆسەكەوە دیارە.

زانیاریی زیاتر: بەڕێوەبەری تەندروستیی هەولێر ڕاشیگەیاند، بەمەبەستی دۆزینەوەی چارەسەریی پێویست بۆ گەڕاندنەوەی خزمەتگوزاریی تەندروستی بۆ نیشتەجێبووانی نێو كەمپەكان، داوای هاوكارییان لە وەزارەتی تەندروستیی عێراق كردووە.