ساکۆ بانگەوازێک بۆ ڕزگارکردنی مەسیحییەکانی عێراق دەکات و پەیامێک بۆ کۆمەڵگەی نێودەوڵەتی دەنێرێت

ئاڤا نیوز

لە کۆڕبەندێکی دیپلۆماسی لە ڤیەننا، کاردیناڵ لویس ساکۆ، پاتریارکی کلدان، نیگەرانی قووڵی خۆی سەبارەت بە دۆخی مەسیحییەکان لە عێراق دەربڕی و داوای پاراستنی مافەکانیان و بوونیادنانی دەوڵەتێکی مەدەنی کرد.

چیرۆکی سەرەکی: لە کۆبوونەوەیەکی باڵای دیپلۆماسییدا، لە یەکێک لە هۆڵە فەرمییەکانی حکومەتی نەمسا لە شاری ڤیەننای پایتەخت، کاردیناڵ لویس ساکۆ، پاتریارکی کلدان لە عێراق و جیهان، وتارێکی پێشکەش کرد. ژمارەیەک لە باڵیۆزان و بەرپرسانی حکومیی ئامادەی ئەم کۆبوونەوەیە بوون.

چی ڕوویدا: پێش وتارەکەی ساکۆ، وۆڵفگانگ شۆسێل، سەرۆکوەزیرانی پێشووتری نەمسا، پێشواز و ناساندنی ساکۆی بۆ ئامادەبووان کرد، ستایشی ڕۆڵی ڕۆحی و مرۆیی پاتریارکەکەی کرد. پاشان ساکۆ دەرفەتەکەی قۆستەوە بۆ خستنەڕووی دۆخی مەسیحییەکان لە عێراق و ئەو ئاستەنگانەی ڕووبەڕوویان دەبێتەوە.

لێدوانی فەرمی: ساکۆ لە وتارەکەیدا ڕایگەیاند، "مەسیحییەکان لە عێراق، کە بە یەکێک لە دێرینترین دانیشتووانی وڵاتی نێوان دوو ڕووبارەکە دادەنرێن، ماوەی زیاتر لە دوو دەیە دۆخێکی نائاسایی و سەختیان بەسەر بردووە، کە کردوونی بە یەکێک لە لاوازترین پێکهاتەکان. بەرزبوونەوەی تووندوتیژیی تائیفی و دەرکەوتنی ڕێکخراوە تیرۆریستییەکان وەک قاعیدە و داعش، ئەوانی ناچار کردووە ڕووبەڕووی هەڕەشەی مانەوە ببنەوە."

وتیشی، "کۆنترۆڵکردنی هەندێک ناوچەی وڵات لەلایەن میلیشیا و گرووپە تاوانکارییەکانەوە، بە شێوەیەکی بەردەوام دۆخی مەسیحییەکانی تێكداوە."

ئاماژەی بەوەشدا "مەسیحییەکان بوونەتە قوربانیی جیاکاری لە دەرفەتی کار و خوێندندا، ڕووبەڕووی هەوڵی موسڵمانکردنی منداڵانی ژێر تەمەن بوونەتەوە، جگە لە سنووردارکردنیان بە یاسا نادادپەروەرەکان."

ساکۆ ئەوەشی خستەڕوو "لە ساڵی 2014، میلیشیایەک دروست بوو کە دەستی گرت بەسەر موڵک و ماڵی مەسیحییەکان لە بەغدا و دەشتی نەینەوا، کورسییەکانی پەرلەمانیی تایبەت بە مەسیحییەکانی داگیر کرد، بەڵام لە ڕاستیدا نوێنەرایەتیی مەسیحییەکانی نەکرد، بەڵکو هەوڵی پەراوێزخستنیانی دا لە ڕووی سیاسییەوە."

کۆچکردن و کەمبوونەوەی ژمارەیان

یەکێک لە گرنگترین خاڵەکان کە پاتریاک ساکۆ جەختی لەسەر کردەوە، کەمبوونەوەی ژمارەی مەسیحییەکان بوو لە عێراق. ئەو ئاماژەی بەوەدا ژمارەیان لە نزیکەی ملیۆنێک و نیو کەس پێش ساڵی 2003، بۆ نزیکەی 400 - 500 هەزار کەس ئێستا کەمبووەتەوە، ئەمەش دوای ئەوەی زیاتر لە ملیۆنێک مەسیحی بۆ دۆزینەوەی ئاسایش و سەقامگیری، وڵاتیان جێهێشتووە.

ساکۆ ڕوونی کردەوە: "مووسڵ پێش ساڵی 2003 نزیکەی 50 هەزار مەسیحی لە خۆگرتبوو، ئێستا تەنیا 70 خێزان ماونەتەوە. سەبارەت بە گوندەکانی دەشتی نەینەواش، هێشتا بەدەست نەبوونی خزمەتگوزاری و دەرفەتی کارەوە دەناڵێنن، کە ژیان لەوێ نزیکەی مەحاڵ کردووە."

پەیام بۆ ناوخۆ و دەرەوە

ساکۆ داوای لە کۆمەڵگەی نێودەوڵەتی کرد، بەتایبەتی یەکێتیی ئەوروپا و نەتەوەیەکگرتووەکان، ڕۆڵێکی کارا بگێڕن لە پاراستنی بوونی مەسیحییەکان لە عێراق و ڕۆژهەڵاتی ناوەڕاست، بەوپێیەی کە ئەوان "ڕیشەی مەسیحییەتن لە ناوچەکە" و شایەتحاڵی مێژووی دێرینی ناوچەکەن.

ئەو جەختی لەوە کردەوە کە مەسیحییەکان داوای ئیمتیازاتی تایبەت ناکەن، بەڵکو داوای مافی تەواوی هاوڵاتیبوون دەکەن کە ئاسایش، کەرامەت و بەشداریکردنیان لە ژیانی گشتیدا مسۆگەر بکات.

ئاماژەی بەوەشدا "چارەسەرەکە لە بوونیادنانی دەوڵەتێکی مەدەنیی مۆدێرندا دەستنیشان دەکرێت، کە لەسەر بنەمای هاوڵاتیبوونی یەکسان بێت، بەدوور لە تائیفەگەری و پشکپشکێنە." داوای ئامادەکردنی دەستوورێکی مەدەنیشی کرد کە ئازادییە ئایینییەکان بپارێزێت و یەکپارچەیی عێراق مسۆگەر بکات، بە دوور لە باڵادەستیی لێکدانەوە ئایینییەکان یان دەسەڵاتی میلیشیاکان.

هەنگاوی کردەیی پێویستن

پاتریاک ساکۆ ژمارەیەک ڕێوشوێنی خستەڕوو کە بە پێویستی زانی بۆ پاراستنی مانەوەی مەسیحییەکان، دیارترینیان:

• دەستبەرکردنی پاراستنێکی ڕاستەقینە لە دەشتی نەینەوا لە ڕێگەی هێزە ئەمنییە فیدراڵییەکانەوە، نەک میلیشیاکان.

•  گەڕاندنەوەی موڵک و ماڵی دزراو و قەرەبووکردنەوەی زیانلێکەوتووان.

• دروستکردنی ژینگەیەکی ئارام و هاندەر بۆ گەڕانەوەی کۆچبەران، بەتایبەتی ئەوانەی لە وڵاتانی دراوسێ نیشتەجێن.

سوپاس و پەیامێکی مرۆیی

لە کۆتایی وتارەکەیدا، ساکۆ سوپاسی حکومەتی نەمسا و سەرۆکوەزیرانی پێشووتری وڵاتەکە، وۆڵفگانگ شۆسێلی کرد بۆ ئەم دەستپێشخەرییە و جەختی لەوە کردەوە ڕەخساندنی دەرفەت بۆ خستنەڕووی ئازارەکانی مەسیحییەکان لە بەردەم کۆمەڵگەی نێودەوڵەتیدا، هەنگاوێکی گرنگە بۆ گەیاندنی دەنگی پەراوێزخراوەکان.

وتیشی، "مەسیحییەکان لە عێراق، مانەوەی خۆیان بە شایەتحاڵییەکی مرۆیی و پەیامێکی ئاشتی دەزانن." داوای پشتیوانیکردنیانی کرد بۆ ئەوەی بەردەوام بن لە بەشداریکردن لە بوونیادنانی عێراقێکی ئارام و گەشەسەندوو کە هەموو پێکهاتەکانی بەبێ جیاوازی لەخۆ بگرێت.