وەزیرێكی كورد لە بەغدا: كار بۆ ئەوە دەكەین هیچ مووچەیەكی ئەمساڵ نەفەوتێت

ئاڤا نیوز

وەزیری ئاوەدانكردنەوە و نیشتەجێكردنی حكومەتی فیدڕاڵ ڕایدەگەیێنێت، تیمی وەزیرە كوردەكان لە بەغدا و حكومەتی هەرێمی كوردستان و سەرۆكوەزیران مەسرور بارزانی لەگەڵ بەرپرسانی حكومەتی فیدڕاڵ لەسەر هێڵێین؛ زەمانەتی سەرجەم مووچەكانی ئەمساڵ بكرێت و هیچ مووچەیەك نەفەوتێت.

وێنە گەورەكە: 50 ڕۆژ ماوە بۆ كۆتاییهاتنی ئەمساڵ، كەچی تاكو ئێستا مووچەی مانگی 9 ـی مووچەخۆرانی هەرێمی كوردستان لە بەغداوە ڕەوانە نەكراوە، ئەوەش لەكاتێكدا نەوتی هەرێمی كوردستان بێ هیچ گرفتێك ڕەوانەی بەندەری جەیهان دەكرێت و مانگانەش بڕی 120 ملیار دینار وەك داهاتی ناوخۆیی دەخرێتە سەر هەژماری وەزارەتی دارایی عێراق.

لێدوانی فەرمی: بەنگین ڕێكانی، وەزیری ئاوەدانكردنەوە و نیشتەجێكردنی حكومەتی فیدراڵ لە لێدوانێكی بۆ دەزگاكانی ڕاگەیاندن لەبارەی مووچەی مانگی 9 و مانگەكانی دیكەی ئەمساڵ وتی، "ڕۆژی ناردنی مووچەی مانگی 9 دیاری نەكراوە، بەڵام لەنزیكترین كاتدا بڕیاری لەسەر دەدرێت. لەبارەی سەرجەم مووچەكانی ئەمساڵیش، چەند گرفتێكی بچووك ماوە بەڵام ئێمە وەك تیمی وەزیرە كوردەكان لە بەغدا و حكومەتی هەرێمی كوردستان و خودی سەرۆكوەزیران مەسرور بارزانی لەگەڵ بەرپرسانی حكومەتی فیدڕاڵ لەسەر هێڵین كە زەمانەتی سەرجەم مووچەكانی ئەمساڵ بكرێت و هیچ مووچەیەك نەفەوتێت."

زانیاریی زیاتر: بەنگین ڕێكانی هاوكات باسی لەوەشكرد، هەردوو حكومەتی هەرێمی كوردستان و فیدڕاڵ تێبینییان لەسەر پرسی داهات و خەرجی هەیە، بەڵام تیمە تەكنیكییەكان بەردەوامن لە چارەسەركردنی خاڵە ناكۆكەكان و زۆری چارەسەركراوە و كەمێكی ماوە.