بەهۆی لێخوڕینی ئۆتۆمبێل بە سەرخۆشی 29 شۆفێر ڕەوانەی دادگا کران

ئاڤا نیوز

شەوی ڕابردوو لە یەکێک لە شەقامەکانی هەولێر، تیمەکانی هۆبەی مەینۆشی بەڕێوەبەرایەتیی هاتووچۆی هەولێر، لە کاتی دەرچوونی تیمەکانیان، لێپێچینەوەیان لە 29 شۆفێرکرد و لە ئەنجامی پشکنین دەرکەوت کە ماددەی کحولی زیاد لە پێویستییان خواردووەتەوە. 

لێدوانی فەرمی: هێمن ئەمین، گوتەبێژی بەڕێوەبەرایەتیی هاتووچۆی هەولێر بە ئاڤای ڕاگەیاند: ئەو 29 شۆفێرە بەپێی ماددەی 22 لە یاسای هاتووچۆی ژمارە 86 ڕەوانەی دادگا کراون و پەڕاوی لێکۆڵینەوەیان بۆ کراوەتەوە، بەپێی ئەم یاسایە هەر کەسێک ئۆتۆمبێک لە ژێر کاریگەری ماددەی هۆشبەر لێبخوڕێت، سزادەدریت بە بەندکردن ماوەکەی لە سێ مانگ کەمتر نەبێت و لە ساڵیک زیاتر نەبێت، یان سزای دارایی دەدرێن بە پێ بژاردن بڕەکەی لە 300 هەزار کەمتر نەبێت و لە 500 هەزار دینار زیاتر نەبێت. یان هەردوو سزاکە دەیگرێتەوە.

ئەمەش بزانە: ڕۆژانە تیمەکانی هۆبەی مەینۆشی لە بەڕێوەبەرایەتیی هاتووچۆی هەولێر، لە شەقامەکان بە ئامێریكی تایبەت پشکنین بۆ ئەو شۆفێران دەکەن کە گومانی ئەوەیان لێ دەکرێت، لەکاتی لێخوڕینی ئۆتۆمبێل هەر ماددەیەکی هۆشبەریان بەکارهێنابێت، دوای پشکنین بۆیان دەربکەوێت بە ڕیژەی 0.05 یان سەرووتر ماددە هۆشبەرەکانی بەکارهێنابێت لێپێچینەوەی لەگەڵ دەکەن و دەست بەسەر ئۆتۆمبێلەکەیدا دەگیرێت.