بەرگریی عێراق: گرێبەستمان بۆ دابینکردنی سیستەمی بەرگریی کردووە و فڕۆکەی تریش دەکڕین

ئاڤا نیوز

وەزارەتی بەرگریی عێراق ڕایگەیاند، ساڵی داهاتوو سیستمی بەرگریی پێشکەوتوو لە کۆریای باشوور وەردەگرن، هەوڵەکانیشیان بۆ دابینکردنی فڕۆکەی جیاوازی جەنگی بەردەوامە.

ئەوەی پێویستە بیزانیت: پێشتر سابت عەباسی، وەزیری بەرگریی عێراق ئاشکرایکردبوو کە ئامانج لەو ڕێککەوتنەیان لەگەڵ کۆریای باشوور ئەوەیە دوور لە واشنتن سسیتمی بەرگریی و چەک دابین بکەن، لەو چوارچێوەیەشدا پلانیان بۆ نوێکردنەوەی دامەزراوەی سەربازیی و جۆری چەکەکان هەیە.

لێدوانی فەرمی: لیوا تەحسین خەفاجی، بەڕێوەبەری ڕاگەیاندنی وەزارەتی بەرگری عێراق بە ئاژانسی هەواڵی فەرمی ڕاگەیاند، کۆریای باشوور پەیوەندییەکی باشی لەگەڵ حکومەتی عێراق هەیە، بۆیەش ڕێککەوتنێک لەگەڵ ئەو وڵاتە کراوە کە لەبواری سیستمی بەرگریشدا وڵاتێکی زۆر پێشکەوتووە، بڕیارە ساڵی داهاتووش ئەو وڵاتە سیستمی بەرگریی ئاسمانیی ڕادەستی عێراق بکات.

زانیاریی زیاتر: بەگوتەی خەفاجی، بەغدا خواستی ئەوەی هەیە ژمارەی فڕۆکەکانی زیاتر بکات ئەویش بەگوێرەی توانای ماددی بەردەست، هەرچەندە ئەوەی ئێستاش هەیە لە ئاستی پێویست دایە، بەڵام وەزارەتی بەرگریی دەیەوێت فڕۆکەی دیکەشی هەبێت کە لە بواری جیاوازدا بەکاردێن، ئەوەش توانای هێزی ئاسمانی بۆ ئەرکی جۆراوجۆر باشتر دەکات.