سێ ڕێککەوتنی بازرگانی لە نێوان عێراق و تورکیا دەکرێت

ئاڤا نیوز 

سەرچاوەیەک لە وەزارەتی بازرگانی تورکیا ئاشكرایكرد، لەمیانی  سەردانەکەی ڕەجەب تەیب ئەردۆغان  و شاندەکەی بۆ عێراق " سێ ڕێککەوتننامەی بازرگانی لە نێوان عێراق و تورکیا" واژۆ دەکرێت.

بۆچی گرنگە: هەناردەی بازرگانی نێوان عێراق و تورکیا پێ دەنێتە قۆناغێکی نوێوە.

لێدوانی فەرمیی: سەرچاوەیەک لە وەزارەتی بازرگانی تورکیا بۆ ئاڤا نیوز گوتی: ئەم سەردانە سەردانێکی بازرگانی دەبێت و رێککەوتنی بازرگانی لە بوارەکانی پیشەسازی و زیادکردنی ئاستی هەناردەی عێراق- تورکیا دەکرێت.

بابەتە ستراتیژییەکە: سێ ڕێککەوتننامەکە لەمانە پێکدێن:
-دامەزراندنی لیژنەی هاوبەشی ئابووری و بازرگانی
 -پرۆتۆکۆڵی دامەزراندنی میکانیزمی ڕاوێژکاری و هاوکاری لە بوارەکانی سەلامەتی بەرهەم و بەربەستە تەکنیکییەکانی بەردەم بازرگانی.
- یاداشتی لێکتێگەیشتن لە نێوان دەستەی پەیوەندییە ئابوورییەکانی دەرەوە و یەکێتی ژوورە بازرگانییەکانی عێراق" پلانی بۆ دانراوە.

وێنە گەورەكە: کۆمپانیاکانی تورکیا لە سەرجەم بوارە جیاوازەکان هەناردەیان بۆ عێراق کردووە، توركيا سێیەم وڵات بووە کە لە ساڵی ڕابردوودا زۆرترین هەناردەیان بۆ عێراق کردووە. 

 ژمارەكان وا دەڵێن: قەبارەی ئاڵوگۆڕی بازرگانی نێوان هەردوو وڵات لە ساڵی 2022دا 24.2 ملیار دۆلار بووە و ساڵی ڕابردووش 19.9 ملیار دۆلار بووە، هاوردەكردن بۆ عێراق بە بەراورد بە ساڵی ڕابردوو بە ڕێژەی 7.2% كەم بووەتەوە و لە ساڵی 2023 گەیشتووەتە 12.8 ملیار دۆلار.