زۆربەی ئەوانەی لە چەم و ڕووبارەکان خنکاون دانیشتووی هەرێمی کوردستانن

ئاڤا نیوز

بەگوێرەی نوێترین ئامار، لەماوەی پێنج مانگی ڕابردوودا تا ئەمڕۆ هەینی 40 ڕووداوی خنکان لە هەرێمی کوردستان تۆمارکراون.

وێنە گەورەکە: بەهۆی بەرزی ژمارەی ڕووداوەکانی خنکان لە ساڵانی ڕابردوو، بەرگری شارستانی هەرێمی کوردستان ئەمساڵ ڕێکار و ڕێنماییەکانی مەلەکردنی توند کردووەو قەدە‌‌غەی خستووەتەسەر چەندین شوێنی مەلەکردنی ناوچە گەشییارییەکان.

لێدوانی فەرمی: سەرکەوت کاڕەش، گوتەبێژی بەڕێوەبەرایەتی گشتی بەرگریی شارستانی هەرێمی کوردستان بە ئاڤا نیوزی ڕاگەیاند: لە سەرەتای ئەمساڵەوە تا ئەمڕۆ هەینی 40 ڕووداوی خنکان تۆمارکراوە، ئەمساڵ جیاوازیەکەی ئەوەیە بەشی هەرە زۆری ئەوانەی خنکاون خەڵکی هەرێمی کوردستانن، ساڵی پار ئەمە پێچەوانە بوو.

زانیاریی زیاتر: سەرکەوت کاڕەش گوتیشی: بەشی هەرە زۆری ئەوانەی خنکاون تەمەنیان لەنێوان 15 بۆ  25 ساڵیدایە و لەتەمەنی هەرزەکارین.

باکگراوند: لە پێنج مانگی یەکەمی ئەمساڵ، 61 کەس بەهۆی ڕووداوەکانی خنکان و سووتان و هەڵدێران لە هەرێمی کوردستان گیانیان لەدەستداوە، ئەمەش بەپێی ئاماری فەرمی حکومەتی هەرێمی کوردستان.