بەڵێنی خەرجکردنی 500 ملیار دینار بۆ جووتیارانی هەرێمی کوردستان دەدرێت

ئاڤا نیوز

دوای گردبوونەوەی دەیان جووتیاری هەرێمی کوردستان لە بەغدا، وەزیری بارزگانیی عێراق بەڵێنی خەرجکردنی پارەی گەنمی ئەمساڵیان پێدەدات کە بڕەکەی زیاتر لە 500 ملیار دینارە.

وێنە گەورەکە: زیاتر لە 40 ڕۆژە پڕۆسەی وەرگرتنی گەنم لە سایلۆکانی هەرێمی کوردستان تەواو بووە، بەڵام تەنیا 12.5% ـی پارەکەی لەلایەن وەزارتی دارایی عێراق خەرج کراوە.

چیرۆکی سەرەکی: پێشنیوەڕۆی ئەمڕۆ  100 جووتیاری هەرێمی کوردستان لەبەردەم وەزارەتی بازرگانیی عێراق گردبوونەوە، دواتر چەند نوێنەرێکیان چاویان بە ئەسیر داود، وەزیری بازرگانیی عێراق کەوت.

 

لێدوانی فەرمی: زۆزان کۆچەر، ئەندامی لیژنەی کشتوکاڵ لە پەرلەمانی عێراق بە ئاڤا نیوزی گوت، "لە کۆبوونەوەکەدا وەزیری بازرگانی بەڵێنی بە جووتیاران دا لە دوو ڕۆژی داهاتوودا لەگەڵ تەیف سامی، وەزیری دارایی کۆببێتەوە و چارەسەری کێشەی خەرجکردنی پارەی گەنمی جووتیاران بکات."

 

ئەوەی پێویستە بیزانت: بڕیاربوو ئەمساڵ جووتیاران لەگەڵ ڕادەستکردنی گەنم  پارەکەی وەربگرن، بەڵام تەنیا 74 ملیار دینار لە کۆی 590 ملیار دینار پارەی گەنمی جووتیارانی هەرێمی کوردستان خەرج کراوە.