سوودانی داوای ڕێگری لە یاریکردن بە بەهای دۆلار دەکات

ئاڤا نیوز

بەمەبەستی پێداچوونەوە بە چاکسازی دارایی و بانکی و ڕێگری لە یاریکردن بە بەهای دینار و دۆلار، محەممەد شیاع سوودانی، سەرۆکوەزیرانی عێراق سەرپەرشتی کۆبوونەوەیەک دەکات. 

 

چیڕۆكه‌ سه‌ره‌كییه‌كه‌: بەهۆى ئاڵۆزی دۆخی ناوچەی ڕۆژهەڵاتی ناوەڕاست و مەترسی هێرشی پێچەوانەی ئیسرائیل بۆ سەر ئێران و گروپە چەکدارەکانی بەناو "بەرەی مقاوەمەی ئیسلامی عێراق"، لە کانوونى یەکەمى ساڵى ڕابردووەوە تاوەکو ئێستا بەهای دیناری عێراقی بەرامبەر بە دۆلار گەیشتە نزمترین ئاست.

 

ڕاگه‌یێنراوی فه‌رمی: نووسینگەی ڕاگەیاندنی سەرۆکوەزیرانی عێراق ڕایگەیاند: سوودانی جەخت لە تووندکردنی ڕێکارەکانی پشکنین لە حەواڵەی دارایی دەکات و داوای لێپرسینەوە لەو کەسانە دەکات کە یاری بە بازاڕی دراو دەکەن لە بەرژەوەندی تایبەتی خۆیان. 

 

زانیاریی زیاتر: لە کۆبوونەوەکەدا کە وەزیری دارایی و پارێزگاری بانکی ناوەندی ئامادەی بوون، داوا لە بانکە حکومییەکان کرا ئاسانکاری بۆ ئەو بازرگان و خاوەنکارانە بکرێت کە لە چوار چێوەی ڕێکارەکانی بانکی ناوەندی کار دەکەن سەبارەت بە حەواڵەی دارایی.

ئەوەی پێویستە بیزانیت: لە چەند ڕۆژی ڕابردوودا بەهای دیناری عێراقی بەرامبەر دۆلاری ئەمریکی بەخێرایی دابەزی، دوێنێ بەهای هەر 100 دۆلارێک گەیشتە 155 هەزار و 900 دینار، بەڵام ئەمڕۆ بەهای دینار بەرزبووە و کاتژمێر 06:27 خولەکی ئێوارەی لە هەولێر بەهای هەر 100 دۆلارێک 153 هەزار دینار و 800 دینار بوو.