ئەگەر هەیە مووچەی نزیكەی چوار هەزار خاوەنپێداویستیی تایبەت ڕابگیرێت

ئاڤا نیوز

 

بەڕێوەبەرایەتیی چاودێریی و گەشەپێدانی كۆمەڵایەتیی سلێمانی داوا لەو خاوەنپێداویستییە تایبەتانە دەكات كە بایۆمەترییان نییە، سەردانی بانكەكان بكەن و بایۆمەتریی بكەن، بەپێچەوانەوە دوو هەفتەی دیكە مووچەكانیان ڕادەگیرێت.

 

چیرۆكی سەرەكی: هەزاران مووچەخۆر لە هەرێمی كوردستان هەن كە بایۆمەترییان نەكردووە، لەهەمان کاتدا پرۆسەی تۆماركردنیان بەردەوامە و ژمارەیەك بانک بۆ ئەو مەبەستە تەرخان كراون، بە بڕیاری وەزارەتی دارایی عێراق تاوەكو 20ـی بوار لەبەردەم مووچەخۆرانە هەیە بۆ خۆتۆمارکردن، بەپێچەوانەوە دوای ئەو وادەیە هەر مووچەخۆرێك بایۆمەتریی نەكردبێت، مووچەكەی ڕادەگیرێت.

 

لێدوانی فەرمی: ژیلوان عادل بەڕێوەبەری گشتیی چاودێریی و گەشەپێدانی کۆمەڵایەتیی سلێمانی لە كۆنفڕانسێكی ڕۆژنامەوانیدا ڕایگەیاند: داوا لە سەرجەم خاوەنپێداویستییە تایبەتەكانی سنووری پارێزگای سلێمانی و ئیدارەی گەرمیان دەكەین، ئەوانەی كە بایۆمەتریی و یوپیئێنیان نییە بە زووترین كات سەردانی ناوەندەكانی تۆماری بایۆمەتری بكەن.

 

زانیاریی زیاتر: 20-11-2024، كۆتا ڕۆژی بایۆمەترییە و هەر خاوەنپێداویستییەكی تایبەت تاوەكو ئەو كاتە بایۆمەتری و یوپیئێن نەكات، ئەوا مووچەكەی لەلایەن حكومەتی عێراقەوە ڕادەگیرێت.

 

گۆشەیەكی دیكە: چەند ساڵێكە تۆماركردنی ناوی تازە بۆ لیستی مووچەی خاوەنپێداویستییە تایبەتەكان وەستاوە و وەزارەتی كار و كاروباری كۆمەڵایەتیی ناوی 13 هەزار خاوەنپێداویستیی تایبەتی ئامادە كردووە و ڕادەستی وەزارەتی دارایی عێراقی كردووە بۆ ئەوەی لەمەودوا مووچەیان پێبدرێت، تاوەكو ئێستا بەغدا وەڵامی نەداوەتەوە.

 

ئەمەش بزانە: لە سنووری پارێزگای سلێمانی و ئیدارەی گەرمیان نزیكەی چوار هەزار خاوەنپێداویستیی تایبەت ماوە كە بایۆمەتری و یوپیئێنیان نەكردووە