مەسرور بارزانی: پێویستە عێراق بێ دواخستن و لێبڕین مووچە بنێرێت

ئاڤا نیوز

 

سەرۆکوەزیران مەسرور بارزانی ڕایدەگەیێنێت، هەرێمی کوردستان هەموو پابەندییەکانی خۆی جێبەجێ کردووە، بۆیە پێویستە بەغدا مووچە و شایستە داراییەکان بێ دواخستن و لێبڕین بنێرێت.

چیرۆکی سەرەکی: ئەلینا ڕۆمانۆوسکی، باڵيۆزى ئه‌مه‌ريكا له‌ عێراق، بەبۆنەی کۆتاییهاتنی ئەرکەکەی سەردانی سەرۆکوەزیران مەسرور بارزانی کرد و چەند بابەتێکیان تاوتوێ کرد.

ڕاگەیێنراونی فەرمی: سەرۆکوەزیران مەسرور بارزانی دەڵێت، تەوەری سەرەکی گفتوگۆکانیان تایبەت بووە بە مووچە و ماف و شایستە داراییەکانی هەرێمی کوردستان. لەمبارەیەوە دووپاتی کردووەتەوە، هەرێمی کوردستان هەموو پابەندییە دەستوورییەکانی خۆی جێبەجێ کردووە، بۆیە پێویستە حکومەتی فیدراڵ مووچە و شایستە داراییەکانی خەڵکی کوردستان بێ دواخستن و لێبڕین بنێرێت.

لەلایەکی دیکەوە: هەردوولا هاوڕابوون لە سەر ئەوەی لەدوای یەکەم دانیشتنی خولی شەشەمی پەرلەمانی کوردستان کە بڕیارە سبەی دووشەمە بکرێت، پێویستە لە زووترین کاتدا حکومەتێکی نوێی یەکگرتوو و بەهێز پێکبهێنرێت.

گۆشەیەکی دیکە: سەرۆکوەزیران مەسرور بارزانی و ئەلینا ڕۆمانۆوسکی جەختیان لە دەستپێکردنەوەی هەناردەکردنی نەوتی هەرێمی کوردستان لە ماوەیەکی نزیکدا کردووەتەوە.