دوو ئۆتۆمبیلی بۆمبڕێژکراو لە شاری حومس تەقینەوە

ئاڤا نیوز

دوو ئۆتۆمبیلی بۆمبڕێژکراو لە ڕۆژهەڵاتی حومس تەقینەوە، بەپێی ئامارە سەرەتاییەکانیش جگە لە زیانێکی زۆری ماددی باس لە برینداربوونی شۆفێرێک دەکرێت.

زانیاریی بەدەستهاتوو: دوو ئۆتۆمبێلی بۆمبڕێژکراو لە نزیک شوێنێکی ئەمنی سەر بە هێزە ئەمنییەکان لە ناوچەی مەخرام فەوقانی لە دەوروبەری ڕۆژهەڵاتی حومس تەقینەوە.

زانیاریی زیاتر: بەگوێرەی ڕوانگەی سووری بۆ مافەکانی مرۆڤ، بەهۆی تەقینەوەکانەوە زیانی ماددی بەر ئەو ئۆتۆمبێلانە گەیشتووە کە لە نزیک شوێنی تەقینەوەکە ڕاگیراون، هاوکات شۆفێری پاسێکیش لە ئەنجامی ڕووداوەکەدا برینداربووە.

لەلایەکی دیکە: هەر بە گوێرەی ڕوانگەی سووری، شاری حومس یەکێکە لەو شوێنانەی کە زۆرترین گرژیی ئەمنی و هەڵمەتی دەستگیرکردن و پاکتاوکردن لەلایەن کەسانی چەکدارەوە بەخۆیەوە دەبینێت و پارێزگاکە لە پلەی یەکەمدایە لەڕووی ژمارەی تاوانەکان و ژمارەی قوربانییەکان.

ژمارەکان وادەڵێن: بەگوێرەی ئامارەکانی ڕوانگەی سووری، 95 کەس لەو شارە کوژراون کە دوویان لە ڕەگەزی مێ بوونە. 60 کەسیان بە هۆی تایفەگەرییەوە کوژراون و ئەوانی دیکەش بەهۆی ئاراستەی سیاسییەوە کوژران لە نێویاندا ئەوانەی لایەنگری ڕژێمی پێشوو بوونە و لە ماوەی ساڵانی پێشوودا هێرشیان کردووەتە سەر خەڵک.