كارمەندانی تەندروستیی شەقڵاوە ڕێژەی 50%ـی دەرماڵەی مەترسییان لێ بڕاوە

 

ئاڤا نیوز

بەشێك لە كارمەندانی تەندروستیی شەقڵاوە ماوەی دوو ساڵە گرفتێكیان هەیە و دەیانەوێت لەڕێگەی ئاڤاوە گرفتەكەیان بۆ چارەسەر بكرێت.

چیرۆکی سەرەکی: بەشێك لە كارمەندانی تەندروستیی شەقڵاوە بە بیانووی ئەوەی لە بنكەكانی تەندروستی دەوام دەكەن و لە نەخۆشخانەكان نین، ڕێژەی 50%ـی دەرماڵەی مەترسی تایبەت بە بەشی تاقیگەكان لێیان دەبڕدرێت، بەو پێیەی بنكەكانی تەندروستی بەشی بانكی خوێنیان نییە، ئەوەش لەكاتێكدا هاوپیشەكانیان كە دەوامیان لە نەخۆشخانەكانە، ڕێژەی 100%ی دەرماڵەكەیان بۆ خەرج دەكرێت.

لێدوانی فەرمییەکان:

- كارمەندەكان دەڵێن: نادادپەروەری و جیاوازییەكە بەمجۆرەیە بۆ نموونە ئەگەر كارمەندێكی تەندروستی مووچە بنەڕەتییەكەی 600 هەزار بێت، ئەگەر لە نەخۆشخانە دەوام بكات، مووچەكەی دەبێتە ملیۆنێك و 200 هەزار، بەڵام هەمان كارمەند ئەگەر لە بنكەی تەندروستی یاخود دیوانی بەڕێوەبەرایەتیی تەندروستی دەوام بكات، مووچەكەی 900 هەزار دینارە واتە جیاوازییەكە 300 هەزار دینارە.

- دكتۆر دلۆڤان محەممەد، بەڕێوەبەری گشتیی تەندروستی هەولێر تایبەت بە ئاڤا ڕایگەیاند، با ئەو كارمەندانە داواكارییەكەیان بەرزبكەنەوە، ئێمەش دیراسەی دەكەین، ئەگەر لەڕووی ئیداری و داراییەوە كێشەی نەبێت و پێچەوانەی ڕێنماییە داراییەكان نەبێت، گرفتەكەیان بۆ چارەسەر دەكەین.