وەزیری تەندروستیی: ساڵی ڕابردوو 239 ملیار دینار لە کڕینی دەرمان بۆ خەڵک گەڕێنراوەتەوە

 

 

ئاڤا نیوز

وەزیری تەندروستیی هەرێمی كوردستان ڕایدەگەیەنێت، هاوردەكردنی دەرمانی بێ كوالێتی و ماوەبەسەرچوو، تا ڕاددەیەكی زۆر كۆنتڕۆڵ کراوە و تەنیا لە ساڵی ڕابردوو زیاتر لە 500 مامەڵەی هاوردەكردنی دەرمانیان ڕەتكردووەتەوە كە لەگەڵ مەرج و ڕێنماییەكانی وەزارەت نەگونجاون و بەم هۆیەوە ڕێگری لە داخیلبوونی هەزاران تۆن دەرمانی بێ كوالێتی كراوە."

چیرۆکی سەرەکی: دكتۆر سامان بەرزنجی، وەزیری تەندروستی هەرێمی کوردستان، لەمیانی بەشداریكردنی لە كۆنفرانسی ساڵانەی چالاكییەكانی بەڕێوەبەرایەتیی گشتی تەندروستیی دهۆك، ژمارەیەك داتا و ئاماری نوێی لەبارەی بنبڕكردنی دەرمانی قاچاغ و بێ كوالێتی بۆ نێو هەرێمی كوردستان خستەڕوو.

لێدوانی فەرمی: وەزیری تەندروستیی ڕایگەیاند:

- لەماوەی ساڵی 2024دا، زیاتر لە پانزە هەزار و 230 مامەڵەی هاوردەكردنی دەرمان تۆماركراون، كە لەلایەن كۆمپانیاكانەوە بە سیستمی دیجیتاڵی داواكراوە، لەو ژمارەیەش 521 مامەڵە ڕەتكراونەتەوە بەهۆی نەبوونی بڕوانامەی پێویست یاخود دەرنەچوونی دەرمانەكان لە پشكنینی كوالێتی كۆنتڕۆڵ، ئەو ڕێكارەش ڕێگر بووە لە داخڵبوونی هەزاران تۆن دەرمانی بێ كوالێتی.

- تەنیا لە ساڵی ڕابردوو نزیكەی 129 هەزار ژمارەی تۆماركردن لە دەرمانە جۆراوجۆرەكان دراوە، ئەمەش بەواتای ئەوە دێت، سەرووی یەك ملیار شریت و پارچە دەرمان بە فەرمی تۆماركراوە و نرخی لەسەر دیاریكراوە.

- داشكانی ڕێژەی 20% بۆ سەرجەم دەرمان و كەرەستە پزیشكییەكان كراوە، بەهۆیەوە نزیكەی 239 ملیار دینار بۆ هاووڵاتیان گەڕاوەتەوە.

- لیژنەكانی پشكنینی سەر بە وەزارەتی تەندروستی، 950 شوێنیان بەسەركردووەتەوە كە شوێنی فرۆشتن و كۆگاكردنی دەرمان و پێداویستی دیكەی پزیشكین، 150 شوێن داخراون بەهۆی پابەند نەبوونیان بە ڕێنماییەكان، لەو ژمارەیەش خاوەنی 20 شوێن دراونەتە دادگا و لیژنەی لێكۆڵینەوەیان لەسەر پێکهێنراوە.