خانەوادەیەکی حەوت کەسی لە ئیدلب بەهۆی تەقینەوەیەکەوە گیان لەدەستدەدەن

ئاڤا نیوز

 

ڕوانگەی سووری بۆ مافەکانی مرۆڤ ڕایگەیاند، حەوت کەسی یەک خانەوادە لە باکووری ڕۆژئاوای سووریا بەهۆی تەقینەوەیەکەوە گیانیان لەدەستداوە.

 

چیرۆکی سەرەکی: بەهۆی هەڵگرتنی کەرستە و پاشـماوەی جەنگییەوە لەلایەن بەشێک لە خانەوادەکانی سووریاوە زۆرجار تووشی کارەساتی مرۆیی دەبن، ڕێکخراوەکانی چاودێری مرۆیش هۆشدارییان لەوبارەیەوە داوە. 

 

ڕاگەیێنراوی فەرمی: ڕوانگەی سووری بۆ مافەکانی مرۆڤ ڕایگەیاند، ڕۆژی پێنجشەممە بەهۆی تەقینەوەی پاشماوەی جەنگی و هەڵگیراوەوە، لە شارۆچکەی نێرەب لە باکووری ڕۆژئاوای سووریا، خانەوادەیەکی حەوت کەسی گیانیان لەدەستداوە کە دوو لە ئەندامەکان ژنێک و منداڵێک بوون. 

 

زانیاریی بەدەستهاتوو: بەگوێرەی ئەو زانیارییانەی لە میدیاکانی سووریا بڵاوکراوەتەوە، ئەو ماڵەی تەقینەوەکەی تیایدا ڕوویداوە، پێشتر کاری کۆکردنەوە و بازرگانیکردنیان کردووە بە پاشماوە جەنگییەکانەوە. 

 

ئەمەش بزانە: بەشێک لە ڕێکخراوە ناحکومییەکانی ئەو وڵاتە هۆشدارییان داوە لە ئەگەری تەقینەوەی ژمارەیەکی زۆر لەو کەرستە جەنگی و سەربازییانەی کە لە ساڵی 2011ەوە تاوەکو ئێستا بەکارنەهێنراون، مەزندە دەکرێت ژمارەی تەقەمەنییە نەتەقیوەکان لە نێوان 100 بۆ 300 هەزار بێت.