ئاگاداری دراوەتە زیاتر لە 100 کارگە و پاڵاوگەی هەولێر

 

ئاڤا نیوز

بەگوێرەی ئەو لیستە بێت دەست ئاڤا میدیا کەوتووە، لە مانگی ڕابردوودا فەرمانگەی ژینگەی هەولێر ئاگاداری داوەتە 103 کارگە و پاڵاوگە.

وێنە گەورەکە: بە هۆی پیسبوونی ژینگەی هەولێر بە دوکەڵ، ڕێکاری نوێ گیراونەتەبەر بۆ کەمکردنەوەی کاریگەری ئەو دوکەڵە، چەندین پاڵاوگە داخراون و هۆشداری دراوەتە دەیانی تر.

زانیاری بەدەستهاتوو: لەماوەی مانگی دوودا فەرمانگەی ژینگەی هەولێر ئاگاداری داوەتە 103 کارگەی قیری شل و پاڵاوگەی هەولێر. ماوەی 10 ڕۆژیان بۆ دانراوە بۆ جێبەجێکردنی بڕیارەکانی فەرمانگەی ژینگەی هەولێر.

ئاگادارکردنەوەکەی فەرمانگەی ژینگەی هەولێر دوو خاڵە ئەمانەن:

٠ بە هیچ شێوەیەک نابێت بەبێ بەکارهێنانی فلتەر بە سیستمی ئاگر کار بکەن.

٠ نابێت بە هیچ شێوەیەک ئاوەڕۆ و پاشەڕۆی ئەو پاڵاوگە و کارگانە بچێتەوە دەرەوە، بەڵکو دەبێت لە شوێنی خۆی چارەسەر بکرێت.

لێدوانی فەرمی: دڵشاد هیرانی، بەڕێوەبەری فەرمانگەی ژینگەی هەولێر بە ئاڤا میدیای وت، بە هۆی ئەوەی شوێنەکان لەیەک دوورن و لیژنەکانیش ژمارەیان کەمە، هەفتەی یەک ڕۆژ لیژنەکان دەردەچن و حەوت بۆ هەشت شوێن بەسەردەکەنەوە. کارگە هەیە مۆڵەتی لە حکومەتی عێراق وەرگرتووە. بەڵام ئێمە ئاگاداری بەوانیش دەدەین، ئەو دوو خاڵە چارەسەر نەکەن دادەخرێن.

باکگراوند: ڕۆژی 2025-01-12، مەسرور بارزانی، سەرۆکوەزیرانی هەرێمی کوردستان کۆبوونەوەیەکی تایبەتی لەگەڵ یەکە کارگێڕییەکان و فەرمانگەکانی ژینگەی هەولێر و دهۆک کرد. چەند بڕیارێک دران، یەکێک لەبڕیارەکان ئەوەبوو، هەر کارگە و پاڵاوگەیەک لە دەرەوەی ڕێنماییەکان کار بکات ڕێکاریی یاسایی لەبەرامبەر دەگیرێتەبەر.