لە کەرکووک پارەی غازی ماڵان بە ئۆنلاین لە هاووڵاتیان وەردەگیرێت

ئاڤا نیوز

بە پێی بڕیارێکی وەزارەتی نەوتی عێراق، فرۆشتنی غازی ماڵان لە ڕێگەی کۆمپانیایەکی تایبەت دەبێت و بەشێوەی ئۆنڵاین پارە لە هاووڵاتییان وەردەگیرێت، بەمەش ناڕەزایی غازفرۆشانی کەرکووکی لێکەوتووەتەوە.

وێنە گەورەکە: ژمارەیەک غازفرۆشی ناو کۆڵانەکان لە نزیک دەروازەی کەرکووک لەدژی فرۆشتنی غاز بە کەرتی تایبەت و فرۆشتنی بەشێوەی ئۆنڵاین گردبوونەوە، هۆشداری دەدەن ئەگەر کێشەکەیان چارەسەر نەکرێت لەبەردەم کۆمپانیای دابەشکردنی بەرهەمە نەوتییەکان مانگرتن ڕادەگەیێنن.

لێدوانی فەرمی: بەختیار عومەر، نوێنەری غازفرۆشانی کەرکووک، بە ئاڤا میدیای ڕاگەیاند، کێشەکەمان ئەوەیە  فرۆشتنی غازی ماڵان دراوە بەکەرتی تایبەت و دەبێت ئۆتۆمبێلەکان ئامێری GPS ببەستن، هاوکات دانانی "پرۆگرامی قنینتی" ئەپڵیکەیشنێکی تایبەت بە غازە و دەبێت هەر ماڵێک لە ڕێگەی کارتی بانکییەوە غاز وەربگرێت.

- ئەگەر ئەوە سەربگرێت نرخی غاز دەچێتە سەرووی 12هەزار دینار، لە کاتێکدا ئێستا نرخی غاز بە حەوت هەزار دینارە.

ئەوەی پێویستە بیزانیت: کۆمپانیایەکی کەرتی تایبەت تەرخانکراوە کە غازی ماڵان بە شێوەی ئۆنڵاین بە هاووڵاتییان دەفرۆشێت لەرێگەی کارتی بانکییەوە پارەکەی دەدرێت، دەبێت بریکارەکان لەڕێگەی ئەو کارتەوە پارەکە بدەن بە کۆمپانیاکە.