دارستان و ژینگەی سلێمانی: لە زیادکردنێکی ئاشکرادا 39 ماسی دەفرۆشین

ئاڤا نیوز

 

ئەگەرچی لە هەرێمی کوردستان وەرزی قەدەغەی ڕاوەماسییە و بڕینی دار بە هەموو شێوەیەک قەدەغەیە، بەڵام سەرپێچیکاران بەردەوامن لەو کارە.

 

وێنە گەورەکە: لە کاتێکدا کە وەرزی قەدەغەکردنی ڕاوەماسی لە هەرێمی کوردستان ڕاگەیێنراوە، بەلام ڕاوچییەکان بەشێوەی جیا جیا و لەکاتەکانی شەودا، هەوڵی ڕاوکردن دەدەن، هاوکات بۆ "خەڵووز" دەیان دار لە شاخ و کێوەکانی چەندین ناوچەی کوردستان بڕدراونەتەوە.

 

ڕاگەیێنراوی فەرمی: بەڕێوەبەرایەتیی پۆلیسی دارستان و ژینگەی سلێمانی ڕایگەیاند: مەفرەزەیەکی بنکەی پۆلیسی دارستان و ژینگەی ئاغجەلەر، دوو تۆڕی ڕاوکردنی ماسییان هەڵگرتووەتەوە و دەستبەسەر 39 ماسیدا گیراوە، هاوکات پەڕاوی لێکۆڵینەوە ڕێکخراوە بۆ وەرگرتنی ڕێکاری یاسایی لەلایەن دادوەری لێکۆڵینەوە.

 

لێدوانی فەرمی: هێمن کەمەرخان، وتەبێژی پۆلیسی دارستان و ژینگەی سلێمانی بە ئاڤای گوت، ئەو 39 ماسیە بە بڕیاری دادوەری لێکۆڵینەوە لە زیادکردنێکی ئاشکرادا دەفرۆشرێن.

 

لەلایەکی دیکەوە: بەشی پۆلیسی دارستان و ژینگەی دووکان لە تەواوی سنووری چالاکییەکانیان 12 تۆڕی ماسیگرتنیان بە قەبارەی جیاواز هەڵگرتەوە.

 

ئەمەش بزانە: بنکەی پۆلیسی دارستان و ژینگەی پیرەمەگرون توانیان دوو هاووڵاتی لەسەر دروستکردنی خەڵووز دەستگیر بکەن، هاوکات دەستبەسەر ئۆتۆمبێلێک و 40 فەردە خەڵووز دا گیرا.