ئێران بەهۆی تەقینەوەکەی بەندەرعەباس سێ ڕۆژ ماتەمینی ڕاگەیاند

ئاڤا نیوز

 

تادێت ژمارەی قوربانیان بەهۆی تەقینەوەکەی بەندەرعەباس بەرزتر دەبنەوە، بەجۆرێک ژمارەی برینداران 800 کەسی تێپەڕاندووە و ژمارەی ئەوانەی گیانیان لەدەست داوە گەیشتووەتە 18 کەس.

 

وێنە گەورەکە: ڕۆژی شەممە ڕێککەوتی 27ـی 4ـی 2025, تەقینەوەیەکی گەورە لە بەندەرعەباس لە ناوچەی بەندەر ڕەجایی ڕوویدا و بەهۆیەوە 18 کەس گیانیان لەدەست دا و 800 کەس بریندار بوون کە برینی هەندێکیان قورسە و خراونەتە ژێر چاودێرییەوە.

 

ڕاگەیێنراوی فەرمی: پارێزگاری هورموزگانی ئێران ڕایگەیاند: بەداخەوە بەهۆی تەقینەوەکە 18 هاووڵاتی گیانیان لەدەست داوە و 800 کەس بریندار بوون کە هەندێک لە بریندارەکان دوای  چارەسەر لە نەخۆشخانە نێردراونەتە ماڵەوە. بەشێکیشیان برینیان سەختە و لەژێر چاودێری ورددان.

 

ئەوەی پێویستە بیزانیت: بەگوتەی ئەو پارێزگارە، تیمەکانی بەرگریی شارستانیی شارەکە لە کوژاندنەوەی ئاگرەکە نزیک بوونەتەوە و پێشبینیی دەکەن ئەمڕۆ بە تەواوی ئاگرەکە بکوژێنرێتەوە.

 

هۆکارە زانراوەکان: "تا کوژاندنەوەی تەواوی ئاگرەکە ناتوانین هۆکاری ڕووداوەکە بزانین و لێکۆڵینەوە بکەین". پارێزگاری هورموزگان وادەڵێت.

 

زانیاریی زیاتر: داوا لە هاووڵاتییانی بەندەرعەباس دەکرێت تا کۆنترۆڵکردنی تەواوی ئاگرەکە دەمامک بەکار بهێنن و دەرگا و پەنجەرەی ماڵەکانیان دەبخەن، ئەمەش بەهۆی خراپی ئەو ماددە زیانبەخشانەی لە کاتی تەقینەوەکە سوتاون.

 

لەلایەکی دیکەوە: محەممەد باقر قالیباف، سەرۆکی پەرلەمانی ئێران بەهۆی تەقینەوەکەوە سێ ڕۆژ ماتەمینی بۆ گیانی قوربانیان ڕاگەیاند.