تەنها لە یەک ڕۆژدا لە سلێمانی 11 هەزار فەرمانبەر خۆیان لە هەژماری من تۆمار کردووە

ئاڤا نیوز

 

لە سلێمانی تەنها لە یەک ڕۆژدا، 11 هەزار فەرمانبەر خۆیان لە هەژماری من تۆمارکردووە، ئەمەش ژمارەیەکی پێوانەییە و ئاستی بەدەنگەوەهاتنی مووچەخۆرانی سنووری پارێزگای سلێمانی بۆ پرۆژەی هەژماری من، بۆ سێ ئەوەندەی پێشوو، بەرزبووەتەوە.

 

وێنە گەورەکە: وەزارەتی دارایی و ئابووریی هەرێمی کوردستان، لەسەر بڕیاری دادگای فیدڕاڵی بۆ بەبانکیکردنی مووچەی سەرجەم مووچەخۆرانی هەرێمی کوردستان، هۆشداری بەو مووچەخۆرانە دا کە تاوەکو ئێستا خۆیان لە هەژماری من تۆمار نەکردووە، بەو پێیەی لەلایەن وەزارەتی دارایی عێراقەوە ئاگادار کراوەتەوە کە تا کۆتایی ئەمساڵ پرۆسەی بەبانکیکردنی سەرجەم مووچەخۆرانی هەرێمی کوردستان تەواو بکرێت، بەپێچەوانەوە ئەوانەی خۆیان تۆمارنەکردووە، مووچەکانیان لەلایەن بەغداوە ڕادەگیرێت. 

 

لێدوانی تایبەت: سەرچاوەیەک لەتیمی هەژماری من تایبەت بە ئاڤا ڕایگەیاند، ئاستی خۆتۆمارکردنی مووچەخۆرانی سنووری پارێزگای سلێمانی ڕۆژ لەدوای ڕۆژ بەرزتر دەبێتەوە و مووچەخۆران بەلێشاو ڕوویان لە بانکەکان کردووە بە مەبەستی تۆمارکردنیان لە هەژماری من.

 

زانیاریی زیاتر: تاکو ئێستا نزیکەی 200 هەزار مووچەخۆر ماون کە خۆیان تۆمار بکەن و زۆرینەیان فەرمانبەران و خانەنشینانی سنووری پارێزگای سلێمانی و ئیدارە سەربەخۆکانی ڕاپەڕین و گەرمیانن.